Denıs Tenniń Qazaqstandaǵy shoýyna Japonııadan keminde 200 jankúıer kelýi múmkin
ASTANA. QazAqparat - Denıs Tenniń Qazaqstandaǵy shoýyna Japonııadan kem degende 200 jankúıer kelýi múmkin. Bul týraly búgin Astanada ótken baspasóz máslıhatynda sportshynyń ózi málim etti.
«Men Japonııadaǵy «Christmas on Ice» atty muz shoýynan oralyp otyrmyn. Olar meni eki jyl qatarynan shaqyrdy. Men úshin Japonııada óz ónerimdi taǵy bir pash etip, Jańa Jyldyq yqylasqa bólený úlken qurmet boldy», - deıdi D.Ten.
Onyń aıtýyna qaraǵanda, bundaı jobalar sportshynyń tájirıbesin arttyrýǵa ǵana emes, qazaqstandyq jobany alǵa jyljytý úshin asa qajet.
«Osyndaı kezde men qazaqstandyq shoýdyń salmaǵy meniń moınymda ekenin túsinemin, sondyqtan mánerlep syrǵanaý sportyn úlken shoý ete bilgen Japonııa syndy elmen bir deńgeıde ótkizýdi oılaımyn. Sonaý Japonııada Qazaqstandaǵy shoýǵa úlken qyzyǵýshylyq bar. Men týrıstik agenttikpen sóılestim. Olardyń aıtýynsha, eger biz qazaqstandyq shoý ótetin merzimdi eki aı buryn habarlandyrsaq, agenttik birden 200 VIP-bıletti satyp alatyndyqtaryn aıtty. Sebebi olar Japonııadan keminde 200 týrıst keletindigine senimdi», - dep atap ótti sportshy.
Aıta keteıik, Denıs Ten Qazaqstanda úsh jyl qatarynan álemniń tanymal sportshylarynyń qatysýymen muz shoýyn ótkizip keledi.
