Denıs Tenniń atasy Oralda oqyǵan (FOTO)
ORAL. QazAqparat - Mánerlep syrǵanaýdan el namysyn abyroımen qorǵap júrgen Sochı olımpıadasy men bıylǵy álem chempıonatynyń qola jáne 2013 jylǵy dúnıe júzi birinshiliginiń kúmis júldegeri Denıs Tenniń atasy qazirgi M.Ótemisov atyndaǵy Batys Qazaqstan memlekettik ýnıversıtetinde oqyǵan. Bul týraly D.Tenniń Elbasynyń qatysýymen ótken «Jastar qýatty Qazaqstan úshin!» respýblıkalyq forýmyna kelgen kezinde belgili boldy.
Bul oqıǵamen sportshy óziniń Instagram betinde oqyrmandarmen qýana bólisken. «Álem chempıonaty Shanhaıda bolyp jatqan kezde maǵan elden habarlasyp, Oralda ótetin forýmǵa shaqyrdy. Meniń Oralǵa baratynymdy bilgen ájem otbasy shejiresinen qyzyqty derektiń betin ashty. Sóıtsem, atam Oraldaǵy ataqty M.Ótemisov atyndaǵy Batys Qazaqstan memlekettik ýnıversıtetin bitirgen eken. Atamdy ózim kórgen joqpyn. Biraq biletinderdiń aıtýynsha, men oǵan óte uqsas ekenmin. Syrtqy túrim de, qımyl-qozǵalys, oıymdy jetkizýim de, tipti qoltańbam da atama keledi eken. Elbasymen kezdesý árqashan shabyttandyrady. Sonymen birge ýnıversıtette bolýym da erekshe áser qaldyrdy. Atam júrgen jerlerde, ol oqyǵan dárishanada bolý qandaı baqyt! Maǵan onyń osynda oqyǵany jónindegi qujattardy, anyqtama, jeke qaǵazdaryn kórsetti. Naǵyz tarıhı derekter. Oraldyqtarǵa meni osylaısha qonaqjaılylyqpen qarsy alyp, jylylyq syılaǵany úshin alǵysymdy aıtyp, qalanyń odan ári jaınap, gúldene berýin tileımin», dep jazady D.Ten.
«Elbasynyń qatysýymen ótetin mundaı jıyndardyń biz sekildi jastardy otansúıgishtikke tárbıeleýde mańyzy zor. Ult kóshbasshysynyń qajyrly eńbegi arqasynda Qazaqstan jıyrma jyldan asatyn ýaqyt ishinde barlyq salada asa úlken tabystarǵa qol jetkizdi. Sonyń ishinde sport salasy, ásirese, ózim aınalysatyn mánerlep syrǵanaýdyń qaryshty damyǵanyn jaqsy bilemin. Qazaqstandyq sportshylardyń jetken bıikteri az emes. Ózim Oralǵa Qytaıdaǵy álem chempıonatynan qola júldemen keldim. Elbasy bizge senedi, sondyqtan aldaǵy ýaqytta da olja salarymyz anyq», degen bolatyn forýmnan keıin sportshy. Ol Oralǵa Shanhaıdan tike ushyp kelgen edi.
Aıta keteıik, D.Tenniń atasy bilim alǵan batysqazaqstandyq ýnıversıtet - respýblıkadaǵy ekinshi baıyrǵy oqý orny. 1932 jyly ashylǵan M.Pokrovskıı atyndaǵy ekinshi qazaq pedagogıkalyq ınstıtýty 1937 jyldan bastap A.Pýshkın atyndaǵy Oral pedagogıkalyq ınstıtýty bolyp ózgerdi. Elimiz táýelsizdik alǵannan keıin 1996 jyly Batys Qazaqstan gýmanıtarlyq, 2000 jyldan memlekettik ýnıversıteti bolyp ataldy. 2004 jyly ýnıversıtetke qazaqtyń uly aqyny ári batyry Mahambettiń esimi berildi.
