Denıs Ten izimen: Shaıdorov erkin baǵdarlamada qalaı baq synaıdy
ASTANA. KAZINFORM – Italııada ótip jatqan XXV qysqy Olımpıada oıyndarynda qazaqstandyq mánerlep syrǵanaýshy Mıhaıl Shaıdorov qysqa baǵdarlama qorytyndysy boıynsha besinshi orynǵa taban tiredi. Konkımen mánerlep syrǵanaýdan ulttyq qurama basshysy Aıza Mámbekova sportshynyń kórsetkishi men erkin baǵdarlamadaǵy basty basymdyqtary týraly aıtyp berdi.
Mıhaıl Shaıdorovtyń qysqa baǵdarlamadaǵy ónerin tóreshiler joǵary baǵalady. Ol tehnıkalyq elementterdiń barlyǵyn derlik minsiz oryndap, 92 upaıǵa ıe boldy. Qurama basshysynyń aıtýynsha, bul – álemdik deńgeıdegi myqty qarsylastar ortasyndaǵy laıyqty kórsetkish.
– Mıhaıldyń besinshi oryn alǵany – sensatsııa emes, bul onyń eńbegine laıyqty oryn. Tehnıkalyq elementteri, sekirimderi men aınalymdary «plıýs» zonasynda oryndaldy. Tóreshiler komponent baǵasyn, obraz, kostıým, mýzyka sál tómendetkenimen, ol sheshýshi ról atqarmaıdy. Eń bastysy – Mıhaıl qazir álemdik reıtıngide úshinshi orynda tur jáne ol muz ústinde ózindik qoltańbasy bar sportshy, – deıdi Aıza Mámbekova «Jibek Joly» telearnasynyń «Live» baǵdarlamasynda.
Mamannyń aıtýynsha, aldaǵy erkin baǵdarlamada Mıhaıl Shaıdorov álemde tek ózi ǵana oryndaı alatyn biregeı elementterdi pash etpek. Bul kaskad onyń Olımpıadadaǵy basty qarýy bolmaq.
– Erkin baǵdarlamada bes «ýltra-sı» elementi josparlanǵan. Onyń ishinde úsh aınalymdy aksel, oıler jáne tórt aınalymdy salhovtan turatyn kaskady bar. Bul elementti qazir álemde tek Mıhaıl ǵana minsiz oryndaı alady. Bul – onyń vızıt kartasy desek te bolady. Eger barlyǵy oıdaǵydaı ótse, biz medaldan úmitkermiz, – dep atap ótti qurama basshysy.
Eske sala keteıik, Mıhaıl Shaıdorov buǵan deıin Tórt qurlyq chempıonatynda jeńimpaz atanyp, álem chempıonatynyń kúmis júldesin ıelengen bolatyn. Búgin sportshy Olımpıadanyń erkin baǵdarlamasynda júldeli oryndar úshin tartysqa túsedi.