Denıs Ten jas sportshylarǵa sabaq berdi
ALMATY. QazAqparat - Mánerlep syrǵanaýshy Denıs Ten Qazaqstannyń jas sportshylary úshin úsh kúndik semınar ótkizdi, dep habarlaıdy QazAqparat tilshisi.
Sportshy mundaı semınarlardy 2012 jyldan beri ótkizip keledi. Biraq kóbine onyń semınarlary muz aıdynyndaǵy shoý nemese iri sport sharasy aıasynda ǵana ótkizilip keldi. Bul joly sheberlik synyby eshqandaı sharaǵa qabattastyrylmaı, derbes, arnaıy uıymdastyryldy. Bul rette Denıs Ten jas sportshylardyń tehnıkalyq jattyǵýlaryna tereńirek mán berdi. Úsh kúndik semınarda elimizdiń barlyq aımaǵynan kelgen úzdik jas mánerlep syrǵanaýshylarmen Denıstiń ózi ǵana emes, onyń áriptesi, reseılik tanymal sportshy Alekseı ıAgýdın de jattyǵady. Sonymen qatar, Qazaqstannyń úzdik horeografy Serik Tashanov pen akter Chıngız Kapın jáne tehnologıst Arman Súleımenov te dáris beredi.
«Men qazir sportshynyń sporttaǵy «ǵumyry», mansaby qysqa ekenin túsindim. Eń uzaǵanda 20-25 jyl sportta júrýge bolatyn shyǵar. Bul jerde basqa salada ózin damytpaǵan adam, sporttyq ǵumyry bitken soń kereksiz sezinip qalady. Sondyqtan men osy joly jas mánerlep syrǵanaýshylarǵa tek sporttyń tehnıkalyq jaǵyn damytyp qana qoımaı, bilimin de jetildirý qajettigin aıttym. Ózderińiz biletindeı, mánerlep syrǵanaýshy ǵana emes basqa da sportshylar úshin fızıkalyq daıyndyqpen qatar, mýzykalyq bilimi, shahmat, matematıka, fızıkadan habary bolýy, erýdıtsııa kerek. Bir táýliktiń 24 saǵatynda adam ózin jan-jaqty damytýyna múmkindik bar», -dedi Denıs Ten.
Aıta keteıik, bul sheberlik synybyna jas sportshylardy qazylar alqasy iriktep alǵan. Oǵan qatysqan balalardyń deni Olımpıada oıyndarynda Qazaqstannyń namysyn qorǵaıtyndar. 2014 jylǵy Olımpıada oıyndarynyń qola júldegeri Denıs Ten balalyq shaǵynda mýzykamen, bımen shuǵyldanyp, taekvondamen aınalysqan. Qazirgi ýaqytta sportshy bir aptalyq eńbek damylysyn ońtústik astanada ótkizip jatyr. Almatyda ol sheberlik synybyn ótkizip qana qoımaı, 250 jankúıerimen kezdespek.
