Denıs Ten jankúıerlerine ýáde berdi
ASTANA. QazAqparat - Qazaqstandyq konkımen mánerlep syrǵanaýshy Denıs Ten jankúıerlerine qoldaý kórsetip jatqandaryna alǵys aıtyp, Bostondaǵy álem chempıonatyna daıyndalyp, onda óner kórsetýge sóz berdi.
Eske sala keteıik, densaýlyǵyna baılanysty sportshy tórt kontınent Chempıonatyna qatysýyn toqtatýǵa májbúr boldy. Ol áleýmettik jelilerde de belsendiligin doǵardy.
«Qurmetti dostar, jyly sózderińiz ben men úshin alańdap otyrǵandaryńyzǵa rahmet. Jaǵdaıym jaqsardy, naýryz aıynda Bostonda bolatyn álem chempıonatyna baramyn», - dedi mánerlep syrǵanaýshy.
Sonymen qatar, Denıs Ten áleýmettik jelilerge nege sırek shyǵatynyn túsindirdi.
«Sońǵy kezderi áleýmettik jelilerdi belsendi paıdalanbaımyn. Smartfondaǵy keı qosymshalardy da óshirdim. Ázirge @d10world lentamdy jáne soundcloud paraqshamdy jańartamyn», - dep jazdy Denıs Instagramdaǵy paraqshasynda.
Konkımen mánerlep syrǵanaý boıynsha álem chempıonaty 28 naýryz ben 3 sáýir aralyǵynda Bostonda (AQSh) ótedi.
