Denıs Ten jáne onyń dostary ulttyq kıimde óner kórsetti
ASTANA. QazAqparat - Búgin Astanada Qazaqstandyq mánerlep syrǵanaýshy, Sochı Olımpıadasynyń qola júlderi Denıs Tenniń «Denıs Ten jáne onyń dostary» atty muzdy shoýy ótti, dep habarlaıdy QazAqparat tilshisi.
Mánerlep syrǵanaý juldyzdary, jandy mýzyka, teatrlyq qoıylym, ınnovatsııalyq tehnıkalyq elementter - osynyń barlyǵy Denıs Tenniń muzdy shoýynan kórinis tapty. Atalǵan shara Astananyń 20 jyldyǵyna oraı QR Mádenıet jáne sport mınıstrligi men Astana qalasy ákimdiginiń qoldaýymen uıymdastyryldy.
Erekshe shoýda Karolına Kostner, Elena Radıonova, Alena Savchenko, Brýno Masso, ıAn Han jáne taǵy basqa mánerlep syrǵanaýdan álemdik deńgeıdegi sport sheberleri óner kórsetti. Árbir mánerlep syrǵanaýshy ónerimen tánti etýmen qatar Qazaqstan týraly ystyq yqylastarymen bólisip, onyń ishinde Astananyń álemde eshqandaı qalaǵa uqsamaıtyn, ózindik ereksheligi bar ekenin aıta kele elordanyń 20 jyldyq mereıtoıymen quttyqtady.
Denıs Ten kórsetken erekshe qoıylymdardyń biri - Dımash Qudaıbergenniń ánine daıyndalǵan arnaıy baǵdarlama.
«Bul qoıylymdy Phenchhan qysqy Olımpıadasynyń fınalynda kórsetýim kerek edi, ókinishke qaraı ol kezde sáti túspedi, sondyqtan daıyndyǵymnyń kóp ýaqyty jumsalǵan baǵdarlamamdy búgin kórsetýdiń reti kelgen sekildi», - dep, óz oıymen bólisti ol.
Kórermender úshin sharanyń basty tosynsyıy shoý sońynda Denıs Ten jáne onyń dostary qazaqtyń ulttyq kıiminde, qazaq ulttyq-sımfonıkalyq orkestriniń qoldaýymen óner kórsetýi boldy. Tánti bolǵan kórermender oryndarynan turyp, dý qol shapalaqpen erekshe yqylastaryn bildirdi.
Muzdy shoýdaǵy qoıylymdar men aıryqsha dekoratsııa, ádemi kostıýmder men mánerlep syrǵanaýdaǵy qaıtalanbas qımyldar Astana turǵyndary men qonaqtaryna erekshe kóńil-kúı syılady.
