Denıs Ten Jańa jyldy otbasynyń ortasynda qarsy almaq
ASTANA. QazAqparat - Sochıdegi Olımpıada oıyndarynyń qola júldegeri, qazaqstandyq mánerlep syrǵanaýshy Denıs Ten qazaqstandyqtardy Jańa 2015 jylmen quttyqtady. QazAqparat tilshisine bergen suhbatynda ol Jańa jyldy óz úıinde, otbasymen birge qarsy alýdy josparlap otyrǵanyn aıtty.
«Bul otbasylyq mereke dep oılaımyn, biraq ókinishke qaraı ony dástúrli túrde úıde qarsy alýǵa múmkindik týa bermeıdi. Máselen, ótken jyly Olımpıada oıyndaryna ázirlenip jatqandyqtan, Jańa jyldy atap óte almadym. Sondyqtan bul kúndi otbasymen, jaqyndarymen birge qarsy alýymdy úlken qýanysh, sondaı-aq 2014 jyldyń jaqsy aıaqtalýy men 2015 jyldyń tamasha bastalýy dep oılaımyn», - dep atap ótti ol. Aldaǵy jyly sportshyny jańa ister kútýde. Denıs Seýlde ótetin tórt qurlyq chempıonatyna (Eýropa chempıonatynyń balamasy) jáne Shanhaıdaǵy Álem chempıonatyna qatyspaq. «Jańa jylǵa deıin sanaýly saǵattar qaldy. Biraq bul merekeniń bar ereksheligi, is júzinde bolyp jatqannyń bári - kúntizbedegi kúnniń aýysýy men saǵattardaǵy jańa ýaqyt qana. Eger 2015 jylǵa joıqyn josparlaryńyz ben úlken maqsattaryńyz bolsa, qazirden bastaı berińiz! Ómirdegi tańǵajaıyp nárseler biz olardy óz qolymyzben jasaǵanda ǵana júzege asady», - dep túıindedi áıgili sportshy.
