Denıs Ten jańa maýsymǵa jańa baǵdarlama daıyndap jatyr
ASTANA. QazAqparat - Qazaqstandyq mánerlep syrǵanaýshy, Sochı Olımpıadasynyń qola júldegeri Denıs Ten jańa maýsymǵa jańa baǵdarlama daıyndap jatyr. Bul týraly sportshynyń «VKontakte» jelisindegi resmı paraqshasy habarlady.
«Men ártis emespin. Muz aıdynda da shyn kelbetimmen óner kórsetip kelemin. Osyǵan deıin jurt aldynda kórsetip kelgen jarystaǵy baǵdalamalarymda betperde kıip, qandaı da keıipkerdi somdaǵan emespin. Ózime joǵary maqsat qoıyp, soǵan jetý jolynda talpynamyn», - deıdi ol.
Denıs Ten ustanymdary týraly ǵana aıta ketpeı, jańa maýsymdaǵy jańa baǵdarlamasy týraly da jazdy.
«Ótken jylǵy «Karýzo» men «Jibek joly» erkin baǵdarlamalarym arqyly qaıta týylǵandaı boldym. Al bul maýsymǵa da erekshe baǵdarlama daıyndap jatyrmyn. Eki baǵdarlama da maýsym sońyna qaraı ózim alǵa qoıǵan bıiginen kórinedi degen senimdemin. Qysqa baǵdarlama ońaılaý bolsa, erkin baǵdarlama kúrdelileý», - dedi.
Qazaqstandyq mánerlep syrǵanaýshy qazir AQSh-taǵy «Toyota Sports Center» kesheninde daıyndalýda. Azdap jaraqatyna baılanysty jattyǵýyn toqtata turǵany týraly da jazdy. Sondaı-aq Kanadanyń Barrı qalasynda ótetin «Autumn Classic» týrnırine qatyspaıtynyn habarlady.
Denıs Ten ázirge kúzde eki Gran-Prı týrnırine qatysýdy josparlap otyr. Onyń biri - «Skate America» dodasy bolsa, ekinshisi - «Trophée Bompard».
«Skate America» Gran-Prı dodasy 23-25 qazan aralyǵynda AQSh-tyń Mılýokı qalasynda ótedi. Jarysqa Brendan Kerrı (Avstralııa), Han ıAn (Qytaı), Floran Amodıo (Frantsııa), Takahıto Mýra (Japonııa) jáne Sema Ýno (Japonııa) syndy sportshylar qatysýǵa ótinish bergen. Al Bordodaǵy (Frantsııa) «Trophée Bompard» Gran-Prı týrnıri qarashanyń 13-15 aralyǵynda ótedi. Bul jarysqa Denısten ózge Patrık Chan (Kanada), Daısýke Mýrakamı (Japonııa), Sema Ýno (Japonııa), Maksım Kovtýn (Reseı) jáne Floran Amodıo (Frantsııa) qatysady dep josparlanǵan, dep jazady massaget.kz.
