Denıs Ten sporttaǵy karerasyn aıaqtaı ma?

ALMATY. QAZAqparat - Phenchhan Olımpıadasynda óner kórsetken frıstaıl-mogýl men frıstaıl-akrobatshy qyzdarmen birge Denıs Ten de Almatyǵa keldi. Sportshylardy əýejaıdan Sport akademııasynyń stýdentteri, oqytýshylary, əriptesteri, jankúıerler kútip aldy, dep habarlaıdy QazAqparat tilshisi.

Denıs Ten dúbirli dodaǵa jeńis úshin emes, jaı ǵana qatysý úshin barǵanyn aıtty. Buǵan onyń ústi-ústine qabattasqan jaraqattary sebep bolǵan.

«Bul meniń tórtinshi Olımpıadam. Men úshin óz baǵdarlamammen óner kórsetýdiń ózi úlken mərtebe. Mende senimnen góri kúdik basym boldy. Biraq sonda da təýekelge baryp qatystym. Men úlken jarysqa qatysqanyma múlde ókinbeımin»,- dedi Denıs Ten.

Qysqa baǵdarlama nətıjesi boıynsha qazaqstandyq mənerlep syrǵanaýshy 70,12 balmen 27-orynǵa taban tiregen bolatyn. Óz baǵdarlamasynda sportshy kúrdeli elementter jasamady. Sondyqtan qazylar onyń eńbegin ortasha baǵalady.

Sportshy bolashaqtaǵy josparymen bólisti.

«Mende bir apta úzilis bolady. Fızıoterapııa qabyldap bolǵan soń bapkerim ekeýmiz birige otyryp kelesi Olımpıadaǵa qatysamyz ba joq pa, sony sheshemiz. Əlem chempıonatyna qatysý-qatyspaýymyz da ekitalaı. Alaıda menen basqa ol jaqta Qazaqstannyń namysyn qorǵaıtyn eshkim joq»,- dedi Denıs Ten.