Denıs Ten: Olımpıada-2022 Qazaqstandy barsha álemge áıgileıdi
ASTANA. QazAqparat - 2022 jylǵy Qysqy Olımpıada oıyndary Almaty qalasynda ótetin bolsa, Qazaqstan barsha álemge tanymal bolady, dep esepteıdi otandyq mánerlep syrǵanaýshy Denıs Ten.
«Olımpıada oıyndary - eshbir týrnırmen salystyrýǵa kelmeıtin alaman týrnır. Bul doda barsha halyqtardy, álemniń barlyq ulttaryn bir sporttyq otbasyǵa biriktire alatyn sıqyrǵa ıe. Olımpıada oıyndary sportpen shuǵyldanýǵa kúsh beredi. Kóbi «bizdiń elde eger qysqy sportshylar az bolsa, Qysqy olımpıadany ótkizýdiń ne keregi bar?» dep aıtyp jatyr. Biraq bizde Qysqy olımpıada ótetin bolsa, qysqy sport túrlerinen de dańqty sportshylar shyǵady emes pe?! 2008 jylǵa deıin Qytaıdy sporttyq derjava dep kim ataǵan?! 2008 jylǵy Beıjiń Olımpıadasynan keıin Qytaıdyń mártebesi qandaı?! Menińshe, Olımpıada oıyndary - memlekettiń sporttyq jetistikterine áser etetin keremet qubylys», - dep atap ótti sportshy.
Onyń oıynsha, Azııa oıyndaryn nemese Ýnıversıadany Olımpıadamen salystyrýǵa kelmeıdi. Olımpıada Oıyndarynyń deńgeıi áldeqaıda joǵary.
«Eger Olımpıada bizde ótetin bolsa, barsha álemniń nazaryn ózimizge qaratamyz. Biz Reseımen shektes el bolǵandyqtan, Sochı qalasyn bilemiz. Biraq sheteldikter Sochı qalasyn tipti bilmeıtin edi. 2014 jyly Qysqy Olımpıada oıyndarynan soń, Sochı Reseıdiń eń tanymal qalalarynyń biri atandy. Sol jaǵdaı Qazaqstanmen de oryn alady. Bul kez kelgen túıtkildi sheshýge úlken serpin beredi», - deıdi Denıs.
Qazaqstandyq mánerlep syrǵanaýshynyń aıtýynsha, odan suhbat alý úshin «New York Times» gazetiniń tilshisi kelgen. Ol suhbat 2022 jylǵy Olımpıadany Almatyda ótkizý múmkindigi sóz bolmaq.
