Denıs Ten ólimi: Oqıǵany kózimen kórgender tabyldy
Qalalyq ІІD habarlaýynsha, atalǵan oqıǵany kózimen kórgen adamdar da tabyldy. Olar Denıs Tenge qol salǵan kúdiktiler ekenin aıtty.
«Betpe-bet kezdesý barysynda Qııasov Nuraly Denıs Tenge pyshaq salǵanyn moıyndady. Sonymen qatar, oqıǵa kýágerleri de tabyldy. Olar kúdiktilermen kezdesý barysynda osy adamdardyń Denısti óltirgenin aıtty. Tergeý barysynda QR QK protsestik talaptaryna sáıkes olardyń quqyqtary túsindirildi», - dedi baspasóz qyzmetinen.
Aıta ketsek, Qazaqstandyq mánerlep syrǵanaýshy Denıs Ten 19 shilde kúni pyshaq jaraqatynan qaza bolǵan edi. Oqıǵa Qurmanǵazy Baıseıitova kósheleriniń qıylysynda 19 shildede túski saǵat 15:00 shamasynda bolǵan. Sportshy kóliginiń aınasyn urlamaq bolǵan eki adamnyń ústinen túsken. Arada bastalǵan janjaldyń saldarynan urylar Denıs Tenge pyshaq suǵyp alǵan. Ol oń jaq sanynyń joǵarǵy tusyna jaraqat aldy. 25 jastaǵy Ten úsh lıtr qan joǵaltyp, aýrýhanaǵa óte aýyr jaǵdaıda jetkizildi. Biraq Almaty qalalyq Densaýlyq saqtaý basqarmasynyń basshysy Serikbol Mýsınov qosymsha qan qajet emestigin jáne resýrstar jetkilikti ekendigin málim etken bolatyn.
2,5 saǵatqa jalǵasqan reanımatsııalyq sharalarǵa qaramastan, aýrýhana dárigerleri onyń ómirine arasha túse almady. Saǵat 17.30-da Olımpıada júldegeri qaıtys boldy.
Adam óltirý babymen qylmystyq is qozǵaldy.
Búgin belgili bolǵandaı, sportshynyń ólimine qatysy bar eki kúdiktiniń biri ustalyp, ol qylmysyn moıyndady. Ekinshi kúdikti - 1994 jyly týǵan Qyzylorda oblysy, Qarmaqshy aýdany, Aqaı aýylynyń týmasy Arman Qudaıbergenovke izdeý jarııalandy.
Sondaı-aq, Denıs Tenniń ólimine kúdikti Nuraly Qııasov kúzetpen Almaly aýdandyq sotyna jetkizilgen.
Al Denıs Tenniń ólimi boıynsha kúdikti ekinshi adam Arman Qudaıbergenov ustaldy.
