Denıs Ten ólimi: Arman Qudaıbergenov aına urlaýdy ınternetten úırengen
ALMATY. QazAqparat - Almatyda Denıs Tenniń ólimi boıynsha ótken sot otyrysynda kúdiktilerdiń biri Arman Qudaıbergenov óziniń qylmys álemine qalaı túskenin aıtty, dep habarlaıdy QazAqparat tilshisi.
Memlekettik aıyptaýshy Qýandyq Dosov júrgizgen suraq-jaýap barysynda Arman Qudaıbergenovtyń 2018 jyldyń mamyrynan bastap kólikterdiń aınalaryn urlap, ony Jibek jolyndaǵy (bazar - red.) belgisiz tulǵaǵa 40 myń teńge shamasynda saýdalaıtyndyǵy belgili boldy.
Sondaı-aq, kúdikti kólik aınasyn urlaǵany úshin jábirlenýshiniń 400 myń teńge dep kórsetken shyǵynymen kelispeıtindigin jáne aınanyń baǵasy ondaı qymbat turmaıtyndyǵyn jetkizdi.
«Men urlyq jasaǵanymdy moıyndaımyn. Maǵan aqsha qatty qajet boldy. Almatyda júrgende aqsha jınap júrdim. Jınaǵan qarajatymdy anama bergim keldi. Astanada júrgende aqsham da turatyn jerim de bolǵan joq. Taǵy qylmys jasasam polıtseıler izime túsetinin bildim. Sol úshin Almatyǵa kettim»,- dedi jábirlenýshi Oksana Tenniń advokaty Nurlan Óstemirovtiń suraǵyna jaýap bergen kúdikti.
Sóziniń sońynda Arman Qudaıbergenov kólik aınasyn urlaýdy qaıdan úırengenin aıtty.
«Onyń bári ınternette tur. Sodan úırendim», - dedi sottalýshy.
Búgingi otyrysta tergeýmen aınalysqan Astana polıtsııa basqarmasynyń anyqtaýshysy Farıza Razbekovadan suraq jaýap alynǵan bolatyn. Polıtsııa qyzmetkeri qylmyskerdiń nege bostandyqqa jiberilgenin túsindirdi.
Odan soń Oksana Tenniń advokaty Nurlan Óstemirov qylmyskerge qatysty bultartpaý sharasyn qabyldaýda óreskel zań buzǵany úshin polıtsıa qyzmetkerlerin jaýapqa tartýdy surady.
Eske salsaq, Denıs Tendi bıyl 19 shildede Almaty qalasynda belgisiz bireýler pyshaqtap ketken edi. Aýyr halde aýrýhanaǵa jetkizilgen sportshy kóz jumǵan bolatyn.
Denıs Tenniń ólimine qatysty qylmystyq is qozǵalyp, kúdiktiler izdestirildi. Elbasy Denıs Tenge qatysty qylmysty muqııat tekserýdi tapsyrdy. Keıin QR ІІM kúdiktilerdiń ustalǵanyn jarııa etti.
