Denıs Ten ólimi: Advokat polıtseılerdi jazalaýdy surady
ALMATY. QazAqparat - Sportshy Denıstiń anasy Oksana Tenniń advokaty Nurlan Óstemirov kúdikti Arman Qudaıbergenovtyń buǵan deıin jasaǵan qylmysyn tergegen polıtsııa qyzmetkerlerin jaýapqa tartý týraly aryzdandy. Búgin Denıs Tenniń ólimine qatysty sot otyrysy Almaty qalalyq qylmystyq ister jónindegi mamandandyrylǵan aýdanaralyq sotynda ótýde, dep habarlaıdy QazAqparat tilshisi
«Arman Qudaıbergenovtyń kólik urlaý deregi boıynsha qozǵalǵan isti tergegen polıtsııa qyzmetkeri men onyń bólim basshysy qylmystyq jaýapkershilikke tartylsyn. Ol (Farıda Razbekova) sizderdi (sýdıany) shatastyryp otyr. Kúdiktiniń sottylyǵyn tekserý úshin prokýratýradan jazbasha túrde ruqsat alýy kerek bolatyn. Sondaı-aq, onyń (Qudaıbergenovtyń) kórsetken mekenjaıy boıynsha da tintý júrgizilmegen. Olar (anyqtaýshy Farıza Razbekova men bólim basshysy Sherıazdanov) QR QPK 136-138- baptaryn óreskel buzdy. Polıtsııa qyzmetkerlerin selqostyq kórsetkeni úshin jaýapkershilikke tartý kerek. Osyǵan baılanysty jeke qaýly shyǵarýyńyzdy suraımyn»,- dedi Nurlan Óstemirov.
Sýdıa Keńshilik Əbildınov bul talap aryzǵa qatysty sheshimdi kelesi otyrysta shyǵaratynyn aıtty.
Al kúdikti Qudaıbergenovtyń ózi polıtsııa tergeýshisiniń ózin urlyqtan soń nege bosatyp jibergenin túsindire almady.
Aıta ketsek, ótip jatqan sot otyrysynda polıtsııa Arman Qudaıbergenovtiń nege bostandyqta júrgenin túsindirdi.
Eske salsaq, Denıs Tendi bıyl 19 shildede Almaty qalasynda belgisiz bireýler pyshaqtap ketken edi. Aýyr halde aýrýhanaǵa jetkizilgen sportshy kóz jumǵan bolatyn.
Denıs Tenniń ólimine qatysty qylmystyq is qozǵalyp, kúdiktiler izdestirildi. Elbasy Denıs Tenge qatysty qylmysty muqııat tekserýdi tapsyrdy. Keıin QR ІІM kúdiktilerdiń ustalǵanyn jarııa etti. Al, qyrkúıek aıynyń sońynda Іshki ister mınıstri Qalmuhanbet Qasymov atalmysh qylmystyq istiń tergelýine qatysty málimet bergen bolatyn.
25 jeltoqsanda Almaty qylmystyq ister boıynsha aýdanaralyq mamandandyrylǵan sotta belgili sportshynyń ólimi boıynsha aldyn ala sot tyńdalymy ótken bolatyn.
