Denıs Ten muzdaǵy shoýǵa bılet jetpegen almatylyqtardy Astanaǵa shaqyrdy
ALMATY. 23 mamyr. QazAqparat - «Men árqashan da Qazaqstanda áıgili sheteldik sportshylardyń qatysýymen muzdy shoý ótkizýdi armandap júrgenmin», - dedi mánerlep syrǵanaýdan ótken álem chempıonatynyń kúmis júldegeri Denıs Ten Almatydaǵy baspasóz máslıhatynda.
BAQ ókilderimen kezdesý barysynda ol óziniń dostaryn - muz shoýyna qatysýshylar men qonaqtardy tanystyryp ótti. Olar óz sporttyq ǵumyrlarynda kezdesken eriksiz ezý tarttyrar túrli oqıǵalardy, sondaı-aq qıyn sátterde bir-birine qalaı qoldaý kórsetkenderin áńgimelep berdi.
Almaty qalasynda 24 mamyr kúni Balýan Sholaq atyndaǵy Sport saraıynda ótetin «Denıs Ten jáne onyń dostary» muzdy shoýyna olımpıada oıyndarynyń kúmis júldegeri, álemniń eki dúrkin chempıony Stefan Lambel, Álem chempıony jáne úsh dúrkin Eýropa chempıony Brıan Jýber, Eýropa chempıony Tomash Verner, birneshe dúrkin álem chempıony Irına Slýtskaıa jáne t.b. qatysatynyn esterińizge sala keteıik. «Jınalǵan quramamyz myqty, men shoý óte qyzyqty ári erekshe bolyp ótedi dep oılaımyn», - dedi D. Ten.
Almatyda bılettiń jetpeı qalǵandyǵyna ol: «Men muz shoýynyń bizde osynshalyqty tanymal ekendigine qýanyshtymyn. Almatydaǵy shoýǵa bılettiń taýsylyp qalǵanyna men qýanamyn ári qaıǵyramyn. Maǵan áli kúnge sheıin shoýdy qalaı kórsek bolady degen suraqtarmen hattar jazylýda. Men bul shoýdy halyqtyń kópshiligi kóredi dep úmittenemin. Ázirge bıletter bar kezde, Astanaǵa asyǵyńyzdar», - dep jaýap berdi.
