Denıs Ten: Meniń taǵy bir maqsatym - ata-anamdy qýantý
ASTANA. QazAqparat - Muzda mánerlep syrǵanaý boıynsha Sochıdegi Olımpıada oıyndarynyń qola júldegeri, 2013 jylǵy álem chempıonatynyń kúmis alqasynyń ıegeri Denıs Ten áleýmettik jeliler arqyly qazaqstandyqtardy óz ata-analaryn qurmetteýge úndedi.
«Ózimniń osy ýaqytqa deıin túıgenderimdi sizdermen bólisemin. Sporttaǵy búgingi jetistikterim úshin búkil ómirimdi arnadym. Bul úshin jalǵyz men emes, ata-anam da óziniń 21 jyldyq ómirin meniń osyndaı belesterdi baǵyndyrýyma arnady», - dep jazdy Denıs Instagram-daǵy óziniń paraqshasynda.
Onyń sózine qaraǵanda, sporttaǵy armandaryna qol jetkizýi úshin Denıstiń januıasy talaı synnan ótken. «Bastapqyda jalǵyz bolǵan edik. Keıin isimiz nátıjeli bolyp, bizdiń eńbegimizdi baǵalap, bizdi qoldaǵan adamdar paıda boldy. Jyl ótken saıyn birtindep meni qoldaýshylar toby quryla bastady, ol - jankúıerlerim, «Astana» kásibı prezıdenttik klýby jáne bútin bir memleket!», - dep atap ótti sportshy. Ol bar kúsh-jigerin Qazaqstannyń dańqyn asyryp, álemdik arenada ózindik izin qaldyrý úshin jumsaıtynyn atap ótti. «Mende budan basqa taǵy bir maqsat bar, ol - januıamdy júldelerimmen, syılyqtarmen jáne ózge de jaǵymdy jańalyqtarymmen qýantý. Olımpıadadan keıin Ahmetjan Esimov maǵan qundy syılyq - «Chevrolet» avtomobılin tartý etti. Men ony aǵama syıladym. Almatyǵa jıi kelmeımin, al baýyrym úshin ol óte qajet. Al «Central Park» TÚK meni jáne otbasymdy keremet syılyǵymen tań qaldyrdy. Muz aıdyn mańynda ornalasqan páter - bul árıne, arman. Rahmet! Bul meniń januıama arnalǵan syılyq, óıtkeni naǵyz batyrlar - solar. Búgingi jetistikterime solardyń arqasynda qol jetkizdim. Ata-analaryńdy qurmetteńder», - dep túıdi Denıs. Eske sala keteıik, ótken aptada Almatyda Denıs Tenniń jýrnalıstermen jáne sportshynyń jankúıerlerimen brıfıngi uıymdastyryldy. Jıynda oǵan jańa páterdiń kilti tabys etildi.
