Denıs Ten Qazaqstanda tanymal bolǵan muz shoýyn qaıta uıymdastyrmaq nıette
ASTANA. QazAqparat - Álem birinshiliginiń kúmis jáne qola medal ıegeri, Olımpıadanyń qola júldegeri, qazaqstandyq mánerlep syrǵanaýshy Denıs Ten Qazaqstanda tanymal bolǵan muz shoýyn qaıta uıymdastyrmaq nıette.
Bul týraly ol búgin Astanada ótken baspasóz máslıhatynda málim etti.
«Shoýǵa keletin bolsaq, ıdeıalar bar. Qazir ákimshilik jumystar men uıymdastyrýǵa qatysty máseleler talqylanýda. Barlyǵy oıdaǵydaı oryn alyp, muz shoýyn uıymdastyrýǵa múmkindik bolatynyna úmittenemin. Sebebi usynystar kóp, osy jobaǵa qatysty úmit te kóp», - deıdi ol.
Onyń sózine qaraǵanda, shoýdy uıymdastyrý jóninde sheshim jasalsa, ony jyl saıyn jetildirip otyrý kerek. Denıstiń pikirinshe, qazaqstandyq shoý óziniń juldyzdar quramymen erekshelenedi.
«Ol - sportty, ónerdi jáne keremet kóńil kúıdi biriktiretin tamasha joba. Birinshi jyly shoý jasadyq jáne ol álemdik qaýymdastyqtyń úlken qyzyǵýshylyǵyn týdyrdy. Byltyr oǵan shet memleketterden týrıster de kele bastady. Bul qýanyshty jaǵdaı, ádette biz bir jerlerge baramyz, al osy jaǵdaıda bizge kelip jatyr. Bıyl da maǵan muz shoýyn ótkizý jóninde kóptegen tilekter keldi. Bul joba bizdiń adamdarǵa mánerlep syrǵanaýdaǵy eń jaryq juldyzdardy óz kózimen kórýge múmkindik syılady. Sebebi fýtbolda Messı men Ronaldý qandaı juldyz bolsa, olar da mánerlep syrǵanaý áleminiń eń dańqty juldyzdary sanalady», - dedi ol.
Qazaqstandyq mánerlep syrǵanaýshynyń sózine qaraǵanda, shoýdy translıatsııalaý quqyǵyn ıelenýge birneshe shetel televızııasy men rejısserleri úlken qyzyǵýshylyq tanyta bastaǵan.
«Qazir maǵan televızııalyq quqyqqa ıelený jóninde bir kompanııa shyǵyp júr. Bizdiń qazaqstandyq muz shoýyn shetelge kórsetse, qandaı keremet bolatynyn elestetip kórińizdershi! Barlyǵy belgili bolǵannan soń, men osyǵan qatysty taǵy arnaıy baspasóz máslıhatyn jasap, barlyǵyn aıtyp beremin», - dedi D.Ten.
Qazirgi ýaqytta ol 2018 jyly ótetin Qysqy Olımpıadada jeńipaz atanýdy maqsat tutyp otyr. Sonymen qatar ol komandalyq álem chempıonatyna arnaıy qonaq retinde shaqyrylyp otyr.
Eske salsaq, bıyl naýryzda Shanhaıda ótken Álem birinshiliginde D.Ten Qazaqstan qorjynyna qola medal salǵan bolatyn. D.Ten Qazaqstan tarıhynda mánerlep syrǵanaýdan álemdik birinshilikterde jáne Olımpıada jarystarynda júlde salǵan alǵashqy sportshy ekenin aıta ketken jón.
