Denıs Ten barsha eldi Qazaqstan halqynyń birligi kúnimen quttyqtady
ASTANA. QazAqparat - Sochı Olımpıadasynyń qola júldegeri, qazaqstandyq mánerlep syrǵanaýshy Denıs Ten otandastaryn Qazaqstan halqynyń birligi kúni merekesimen quttyqtady.
«Barlyq qazaqstandyqtardy 1 mamyr merekesimen quttyqtaımyn! Bizdiń memleketimizdiń eń basty ıdeıasyn kórsetetin birden-bir mereke - osy. Qaıǵyly bolsa da, sońǵy oqıǵalar Qazaqstan halqyn bir otbasydaı jumyldyrdy. Dilimizdiń osy qasıeti, osy ereksheligi - kópultty Qazaqstannyń marjany», - dedi ol Instagrammdaǵy paraqshasynda.
«Aqjarqyn, kóńildi oqıǵalar halqymyzdyń birligin nyǵaıtsyn, aspanymyz búgingideı árdaıym ashyq bolsyn», - dep atap ótti D.Ten.
