Denıs Ten Astanaǵa mánerlep syrǵanaýdan álemdik juldyzdardy shaqyrýda
ASTANA. 28 sáýir. QazAqparat - Elordada 25 mamyr kúni álem chempıonatynyń kúmis júldegeri Denıs Ten bastamashy bolǵan «Denıs Ten jáne onyń dostary» atty biregeı muz aıdyny shoýy ótedi.
Shoý Astana qalasy ákimdigi men qalalyq Týrızm, dene tárbıesi jáne sport basqarmasynyń qoldaýymen «Alaý» muz aıdyny saraıynda uıymdastyrylady, dep habarlady Muz aıdyny saraıynyń baspasóz qyzmetinen.
«Bul shoýǵa mánerlep syrǵanaýdy qurmetteýshiler úshin álemdik dárejedegi sportshylar shaqyrylǵan. Onyń ishinde qazirgi juldyzdar da bar», - deıdi Denıs Ten. Jobaǵa óziniń qatysatyndyǵyn qazirdiń ózinde álemdik juldyzdar: Stefan Lambel, Braıan Jýber, Irına Slýtskaıa, Karolına Kostner rastady.
Elimizge konkımen mánerlep syrǵanýshy álem úzdikterin shaqyrý Denıs Tenniń kópten bergi armany bolatyn. Álem chempıonatyndaǵy keremet óner kórsetýi osy armanyn júzege asyrýdy aqıqatqa aınaldyrdy.
«Bul bizdiń elimiz úshin syılyq bolady», - dep toqtalǵan Denıs Ten:«Shoýdyń maqsaty - adamdardy mánerlep syrǵanaýǵa tartý. Taıaý bolashaqta bizdiń elimizden de jańa juldyzdar shyǵyp jatsa, memlekettiń mártebesi emes pe?», - dedi.
Astana.kz saıtynyń jazýynsha, Kórermender mánerlep syrǵanaýshylardyń baǵdarlamasynan klassıkalyq týyndylarmen qatar, joba úshin qazaqstandyq estrada juldyzdarynyń qatysýymen ázirlengen jeke nómirlerdi de kóre alady. Jobanyń jekelegen bóliminde - mánerlep syrǵanaýshylardyń muz ústindegi ekstrım oryndaýlary kórsetiledi.
