Denıs Evseev juptyq synda Pákistandaǵy jarystyń jeńimpazy atandy

ASTANA. KAZINFORM — Qazaqstandyq tennısshi Denıs Evseev juptyq synda Islamabad (Pákistan) chellendjer týrnırinde úzdik shyqty.

Jarystyń 4-raketkasy bolyp tirkelgen qazaqstandyq tennısshi chehııalyq Domınık Palanmen birge fınalda pákistandyqtar Aısam-ýl-Hak Kýreshı – Mýzammıl Mýrtazamen bas júldeni sarapqa saldy.

Birinshi partııada taı-breıkte qazaqstandyq-chehııalyq dýet sátti oınady – 7:6 (7:3).
Ekinshi sette 6:4 esebi tirkeldi.

Bir saǵat 20 mınýtqa sozylǵan básekede Evseev – Palan 4 eıspen birge 10 breık-poınttyń úsheýin paıdalandy. Pákistandyq jup 4 eıs, 2 breıkpen (6 breık-poınt) kózge tústi.

Álemniń 404-raketkasy Denıs Evseev jekeleı synda jartylaı fınalda reıtıngide 473-oryndaǵy túrkııalyq Mert Alkaıaǵa jol berdi – 7:6 (9:7), 1:6, 3:6. Bul oıyn 1 saǵat 45 mınýtta aıaqtaldy.

Taǵy bir qazaqstandyq, 18 jastaǵy Ámir Omarhanov Monastır (Týnıs) ITF M15 týrnıriniń fınalynan tys qaldy. Ol jartylaı fınalda álemniń 585-inshi, osy jarystyń 1-raketkasy, frantsııalyq Tomas Fýrelge ese jiberdi – 3:6, 1:6.

Eske sala keteıik, budan buryn Ámir Omarhanovtyń Týnıstegi týrnırde qarsylasyn oısyrata utyp, jartylaı fınalǵa ótkenin jazǵan bolatynbyz.

Sondaı-aq Zarına Dııas Aýstralııa ashyq chempıonatyna joldama aldy.