Denıs Evseev Portýgalııadaǵy jarystyń ekinshi aınalymyna shyqty

ASTANA. KAZINFORM — Qazaqstandyq, álemniń 258-raketkasy Denıs Evseev Eshtorıl (Portýgalııa) chellendjer týrnıriniń ekinshi aınalymyna joldama aldy. 

Qazaqstandyq tennısshi irikteý saıystarynyń jartylaı fınalynda reıtıngide 760-oryndaǵy úndistandyq, 17 jastaǵy Manas Dhammeni 6:0, 6:3 esebimen tize búktirdi.

Denıs Evseev irikteý saıystarynyń fınalynda álemniń 372-raketkasy, ıtalııalyq Djovannı Fonıoǵa jol berdi – 3:6, 3:6.

Soǵan qaramastan, týrnırdi uıymdastyrýshylar qazaqstandyq sportshyny negizgi jarysqa qosty.

Denıs Evseev alǵashqy aınalymda reıtıngide 280-satydaǵy belgııalyq Kımmer Koppeıanspen sheberlik baıqasty. Munda qazaqstandyq tennısshi 6:2, 6:4 esebimen basym tústi. Saǵat jarymǵa jýyq ýaqytqa sozylǵan báseke barysynda Evseev 2 eıspen birge 5 breık-poınttyń tórteýin múlt jibergen joq. Koppeıans 1 eıs, 1 breıkpen (7 breık-poınt) shekteldi.

Denıs Evseev shırek fınalǵa shyǵý úshin álemniń 47-raketkasy, serbııalyq Mıomır Ketsmanovıch nemese reıtıngide 79-oryndaǵy germanııalyq ıAn-Lennard Shtrýftyń qaı jeńgenimen talasady.

Taǵy bir qazaqstandyq, álemniń 208-raketkasy Beıbit Juqaev irikteý saıystarynyń jartylaı fınalynda kútpegen jerden reıtıngide 709-satydaǵy portýgalııalyq Fransıshký Roshadan jeńildi – 4:6, 6:1, 6:7 (6:8).

Eske sala keteıik, budan buryn Aleksandr Býblıktiń Madrıd masters týrnırinde shırek fınalǵa shyǵa almaǵanyn jazǵan bolatynbyz.