Denıs Evseev kambekpen Úndistandaǵy týrnırdiń shırek fınalyna ótti

ASTANA. KAZINFORM — Qazaqstandyq tennısshi, álemniń 362-raketkasy Denıs Evseev Chennaı (Úndistan) chellendjer týrnıriniń shırek fınalyna shyqty.

Qazaqstandyq tennısshi ekinshi aınalymda dúnıejúzilik reıtıngide 513-orynda turǵan úndistandyq Sası Kýmar Mýkýndtyń meselin qaıyrdy.

Birinshi partııada kort ıesi 6:3 esebimen basymdylyq tanytty. Budan keıin D.Evseev oıyn tizginin qolyna alyp, kambek jasaı aldy – 6:2, 6:3.

Bir saǵat 47 mınýtqa sozylǵan básekede Evseev 6 eıspen birge 8 breık-poınttyń teń jartysyn qur jibergen joq. Mýkýnd 4 eıs, 2 breıkten (9 breık-poınt) asa almady.

Denıs Evseev jartylaı fınalǵa shyǵý úshin álemniń 196-ynshy, osy jarystyń 2-raketkasy, argentınalyq Federıko-Agýstın Gomespen talasady.

Qazaqstandyq tennısshi juptyq synda da óner kórsetip, bir kúnde eki match ótkizýine týra keldi.

D.Evseev ýkraınalyq Erık Vanshelboımmen birge alǵashqy aınalymda úndistandyqtar, dodanyń 2-raketkalary Sınthant Bantııa – Saket Mınenıge tartysty oıynda jol berdi – 6:2, 1:6, 2:10.

Eske sala keteıik, budan buryn Denıs Evseevtiń Úndistandaǵy týrnırde sensatsııa jasaǵanyn jazǵan edik.

Sondaı-aq Elena Rybakına Dohadaǵy týrnırdiń úshinshi aınalymyna joldama aldy.