Denıs Evseev Helsınkı týrnıriniń shırek fınalyna shyqty

ASTANA. KAZINFORM – Qazaqstandyq tennısshi, álemniń 218-raketkasy Denıs Evseev Helsınkı (Fınlıandııa) chellendjer týrnıriniń shırek fınalyna joldama aldy.

Qazaqstandyq tennısshi aldymen dúnıejúzilik reıtıngide 946-orynda turǵan estonııalyq, 19 jastaǵy Olıver Oıakaerdi 6:2, 6:4 esebimen tize búktirdi.

D.Evseev ekinshi aınalymda álemniń 241-raketkasy, ıtalııalyq Federıko Arnaboldımen kezdesti. 

F.Arnaboldı alǵashqy aınalymda álemniń 108-inshi, osy jarystyń 6-raketkasy, qazaqstandyq Mıhaıl Kýkýshkındi 6:4, 7:5 esebimen jeńip ketken edi.

D.Evseev sonyń esesin qaıtaryp, F.Arnaboldıdi 6:2, 6:4 esebimen utty. Bir saǵatqa jetpeıtin ýaqyt ishinde Denıs 1 eıspen birge 5 breık-poınttyń tórteýin qur jibergen joq. Arnaboldı 3 eıs, 1 breıkpen shekteldi.

Denıs Evseevtiń shırek fınaldaǵy qarsylasy keıin anyqtalady.

Eske sala keteıik, budan buryn Elena Rybakınanyń jyldyń qorytyndy týrnırinde ekinshi ret utylǵanyn jazǵan bolatynbyz.