Denıel Djeıkobs: Golovkınmen aıqas - ómirimdegi eń úzdik jekpe-jek
ASTANA. QazAqparat - Gennadıı Golovkın (36-0, 33 KO) men Denıel Djeıkobstyń (32-1, 29 KO) jekpe-jegi jaqyn qalǵanda, jankúıer qaýymnyń basty taqyryptarynyń biri amerıkalyqtyń qarsylasynan úreılenetini jaıynda boldy.
Bul áńgime, ásirese onyń Gennadııden ólerdeı qorqatynyn moıyndaǵannan keıin tarap ketti.
Alaıda rıngke shyǵatyn kún taıanǵanda, Djeıkobs úreı oǵan kedergi bola almaıtynyn jetkizdi.
«Golovkın sııaqty jigitti qulatý úshin óziń myqty bolýyń shart. Men úreıge berilmeımin. Ómirimdegi úzdik aıqastyń kezi keldi, - dedi Dennı. - Men úshin keremet múmkindik. Kúsh-qýatym tasyp, aıqasqa tolyqtaı ázirmin. Bul meniń qalaýym. Qolymnan keletinine senemin. Menen muny eshkim de tartyp ala almaıdy».
Golovkın - Djeıkobs jekpe-jegi Gennadııdiń WBC, WBA Super, IBF jáne IBO tıtýldary úshin Nıý-Iorkte (AQSh) 18 naýryzda ótedi.
