Denıel Drıskoll AQSh-tyń Ýkraına boıynsha arnaıy ókili bolyp taǵaıyndaldy
ASTANA. KAZINFORM — Drıskoll Kellogty Ýkraına boıynsha arnaıy ókil laýazymynda almastyrady. Bul týraly The Guardian gazetine silteme jasap TASS agenttigi habarlaıdy.
AQSh Prezıdenti Donald Tramp Qurlyq áskerleri mınıstri Denıel Drıskolldy Ýkraına boıynsha jańa arnaıy ókil etip taǵaıyndady.
Derekkózder málimetinshe, Tramp Drıskolldy Ýkraına boıynsha arnaıy ókil etip taǵaıyndaý týraly sheshimdi AQSh-tyń joǵary laýazymdy áskerı qyzmetkerleri beısenbi kúni Kıevte Vladımır Zelenskıımen ótkizgen kelissózderinen keıin qabyldaǵan. Bul laýazymda Drıskoll Kıt Kellogty almastyratyn bolady.
Sársenbi kúni Reuters agenttigi derekkózderge silteme jasap, Kellog 2026 jyldyń qańtarynda laýazymynan jáne Tramp ákimshiliginen ketýdi josparlap otyrǵanyn habarlaǵan edi.
2024 jylǵy 27 qarashada AQSh Prezıdenti Donald Tramp zeınetke shyqqan general Kıt Kellogty Reseı men Ýkraına boıynsha AQSh arnaıy ókili etip taǵaıyndaǵan, biraq keıin onyń mandatyn qysqartyp, tek Ýkraına boıynsha arnaıy ókil retinde belgilegen. Osy laýazymyna kiriskennen keıin Kellog Kıevpen tikeleı baılanysta bolǵan.
Denıel Drıskoll basshylyq etken AQSh delegatsııasy 20 qarashada Kıevte Zelenskııge Vashıngtonnyń Ýkraına-Reseı máselesin retteý boıynsha jańa josparyn usynǵan.
Pýtın men Zelenskıı Tramptyń beıbitshilik josparyna jaýap bergeni anyqtaldy.
Budan buryn Tramp Ýkraına boıynsha josparǵa qol qoıý úshin «qolaıly merzimdi» atady.