«Deni saý ult»: 2025 jylǵa deıin elimizde 19 «erte aralasý» ortalyǵy salynady
«Deni saý ult» ulttyq jobasynyń «Negizgi aýrýlar kezindegi medıtsınalyq kómek jáne medıtsınalyq ońaltý mindeti» dep atalatyn bóligi boıynsha 223 mlrd 868 mln teńge bólinbek. QazAqparat QR Densaýlyq saqtaý mınıstrligine resmı saýal joldap, osy qarajat naqty qandaı iske jumsalatynyn surady.
«Ulttyq joba sheńberinde múmkindigi shekteýli balalardy medıtsınalyq ońaltýmen qamtýdy kezeń-kezeńimen 60%-ǵa deıin ulǵaıtý josparlanǵan. Búginde densaýlyq saqtaý júıesinde balalarǵa arnalǵan 36 ońaltý ortalyǵy jumys isteıdi (onyń ishinde: respýblıkalyq - 3, óńirlik – 33). Medıtsınalyq ońaltýdyń qoljetimdiligin arttyrý úshin Ońaltý ortalyqtary men qalpyna keltirý em sharalaryna arnalǵan tósekterdiń qatary jyl saıyn keńeıip keledi», - dep jazylǵan mınıstrliktiń baspasóz qyzmeti usynǵan jaýapta.
Vedomstvo bergen málimet boıynsha, byltyr 16 982 bala ońaltýdan ótken. Al bıyl alǵashqy 6 aıda ońaltý sharalarymen 31 671 bala qamtylǵan kórinedi.
«Sonymen qatar, Elbasynyń «Qamqorlyq» bastamasyn iske asyrý aıasynda óńirlerde 8 ońaltý ortalyǵyn jáne 19 erte aralasý ortalyǵyn ashý josparlanýda. Bul nysannyń bári bıýdjetten tys qarajatqa salynady», - delingen jaýapta.
Joǵaryda atalǵan 223,8 mlrd teńgeniń kómegimen atalǵan ortalyqtardaǵy medıtsına mamandarynyń aılyǵyn kóterý kózdelgen, kózdelmegenin de suraǵan bolatynbyz. Mınıstrlik mamandary jalpy medıtsına ókilderiniń aılyǵy qalaı kóbeıetini týraly aqparat berýmen shekteldi.
«2021 jylǵy 1 qańtardan bastap densaýlyq saqtaý salasyndaǵy 247 myń medıtsına qyzmetkeriniń, onyń ishinde: dárigerlerdiń jalaqysy ortasha eseppen 30% (189-dan 246 myń teńgege deıin) jáne orta medıtsına qyzmetkerleriniń jalaqysy 20% (121-den 145 myń teńgege deıin) ósti.
QR Densaýlyq saqtaý mınıstrligi medıtsına qyzmetkerleriniń jalaqysyn arttyrý jónindegi is-sharalardy jalǵastyrýda jáne 2023 jylǵa qaraı medıtsınalyq qyzmetkerlerdiń jalaqysyn ekonomıkadaǵy ortasha jalaqyǵa qaraǵanda 2,5 esege deıin (561 myń teńgege deıin) arttyrý josparlanýda», - dep jazady mınıstrliktiń baspasóz qyzmeti.
