Denı Sassý-Ngesso Qazaqstandy Kongonyń munaı sektoryna ınvestıtsııa salýǵa shaqyrdy

ASTANA. KAZINFORM – Aqordada Memleket basshysy Qasym-Jomart Toqaevpen kelissózderden keıingi BAQ ókilderine arnalǵan brıfıngte Kongo Respýblıkasynyń Prezıdenti Denı Sassý-Ngesso Qazaqstandy Kongonyń munaı sektoryna ınvestıtsııa salýǵa shaqyrdy.

«Meniń eliminiń ekonomıkasy da Qazaqstan sııaqty negizinen munaı sektoryna arqa súıeıdi. Bul salada synaqtan ótken tájirıbesi bar Qazaqstan Kongo operatorlarynyń aktsıonerlik kapıtalyna ınvestıtsııa salý arqyly paıda ákelýge qaýqarly. Elimiz munan ózge de resýrstarǵa, onyń ishinde taý-ken oryndaryna baı. Máselen, fosfat, kalıı Pýent-Nýar teńiz aımaǵynda óte kóp. gaz, fosfat jáne saqardyń mol qoryna ıe Kongo búginde aýyl sharýashylyǵy ónimdiligin arttyrý úshin tyńaıtqysh óndirý múmkindigin qarastyra alady», - dedi Kongo Prezıdenti. 

Onyń atap ótýinshe, Kongoda aýyl sharýashylyǵyn qarqyndy damytý úshin aýqymdy tyń jer, jas jumys kúshi, ónimdi topyraq, mol kún kózi men jaýyn-shashyn bar. 

«Damý jobalaryn iske asryý bizdiń qyzmetimizdiń negizgi baǵyttarynyń biri sanalady. Bul rette sóz sý elektr stansasy sııaqty energetıkalyq ınfraqurylymdar, joǵary tehnologııalyq ónerkásip nysandary, zamanaýı keshender, turǵyn úıler salý jaıynda bolyp otyr», - dedi Denı Sassý-Ngesso.