Denı Sassý-Ngesso Qasym-Jomart Toqaevty Kongoǵa saparmen kelýge shaqyrdy
ASTANA. KAZINFORM – Aqordada Memleket basshysy Qasym-Jomart Toqaevpen kelissózder júrgizgen Kongo Respýblıkasynyń Prezıdenti Denı Sassý-Ngesso Memleket basshysyn Brazzavılge saparmen kelýge shaqyrdy.
«Búginde biz qarym-qatynasymyzdy kúsheıte túsetin birqatar sheshimdi qabyldap, júzege asyryp jatyrmyz. Prezıdent myrza, Kongoda Qazaqstan Elshisin taǵaıyndaý týraly sheshimińizge rızashylymdy bildiremin. Menińshe, bul sheshim sizdiń úlken áleýeti bar elderimiz arasyndaǵy qarym-qatynasty kúsheıtip, damytýǵa degen nıetińizdi bildiredi. Bul jaıynda biz keshe jáne búgin sóılestik. Sonymen qatar sarapshylarymyz ben mınıstrlerimiz birleske jumys júrgizip, birqatar kelisim ázirledi. Olardy biz júzege asyrýǵa tyrysamyz», — dedi mártebeli meıman.
Kongo Prezıdenti eki birlesip júzege asyratyn jobalardyń jemisti ári ózara tıimdi bolatyndyǵyna senim bildirdi.
«Sonymen qatar elderińizdiń sońǵy 20 jylda qol jetkizgen jetistigin de atap ótkim keledi. Qazaqstan Ortalyq Azııadaǵy eń mańyzdy elge aınaldy. Óıtkeni, jalpy ishki ónimi Ortalyq Azııa boıynsha 50 paıyzdy quraıdy. Biz bul jetistikti qoldaımyz. Sonymen qatar Qazaqstandaǵy dostarymyzdyń barlyq salada mol tájirıbesi bar ekendigin de atap ótkim keledi. Búginde biz sol tájirıbeni qoldanǵymyz keledi. Munan bólek, sizdi Brazzavılge, Kongoǵa shaqyramyn. Biz úshin bul úlken mártebe», — dedi Denı Sassý-Ngesso.
