«Denejnyı potok» qarjy pıramıdasy 370 salymshynyń 200 mln teńgesin joq qylǵan - ShQO
ÓSKEMEN. QazAqparat - ShQO-da «Denejnyı potok» qarjy pıramıdasyn uıymdastyrýshylar sottaldy, dep habarlaıdy QazAqparat Qarjylyq monıtorıng agenttigine silteme jasap.
Qarjy pıramıdasy – salymshylar kiristerdi jańa qatysýshylardyń jarnasy esebinen ǵana alatyn, qylmystyq jaza kózdelgen (QR QK 217-baby) ınvestıtsııalyq shema.
Aqsha aǵymy toqtaǵannan keıin, tólem de toqtatylady jáne shemaǵa qatysýshylardyń kópshiligi qarajatsyz qalady.
Tabys alýǵa kepildik berilgen jalǵyz adam – qarjy pıramıdasynyń uıymdastyrýshysy.
Tehnologııalardyń damýy jaǵdaıynda paıda alý tásilderi de qatar damyp keledi.
Búgingi tańda qylmystyq shemalardy qurýdyń ártúrli marketıngtik quraldary (messendjerler arqyly aqparat taratý, áleýmettik jelilerdegi jarnama jáne basqa) qoldanylady.
Shyǵys Qazaqstan oblysy boıynsha ekonomıkalyq tergep-tekserý departamenti aınalymy 200 mln teńgeden asatyn «Denejnyı potok» qarjy pıramıdasynyń qyzmetin toqtatty.
Tergeý barysynda 2019-2020 jyldary ShQO-nyń eki turǵyny messendjer arqyly Reseıdiń iri qurylys kompanııasynyń qyzmeti túrinde alaıaqtyq shemany uıymdastyrǵany anyqtaldy.
Qarjy pıramıdasyn uıymdastyrýshylar eki aı ishinde jarna somasynyń 25% mólsherinde apta saıyn mol paıda tabýǵa ýáde bergen.
Bul rette senip qalǵan salymshylar resmı shart jasaspaǵan, al aqsha aýdarymyn uıymdastyrýshylardyń kartasyna jibergen.
Qarjy pıramıdasyna 370-ten astam adam aldanyp, onyń tek 43-i organdarǵa júgindi.
Kináli tulǵalar 5 jylǵa bas bostandyǵynan aıyryldy.
