Denesine 52 chıp ornatqan áıel Gınnestiń rekordtar kitabyna endi

AQSh-ta turatyn áıel denesine 52 tehnologııalyq ımplant ornatý arqyly rekordtar kitabyna endi. Ol chıpterdiń kómegimen kompıýterdi qozǵalyssyz iske qosa alady, telefon soǵa alady, dep habarlaıdy Kazinform.

Amerıka Qurama Shtattarynda turatyn 48 jastaǵy Anastasııa Sın óziniń denesinde eń tehnologııalyq ımplanttary bar áıel retinde Gınnestiń rekordtar kitabyna endi. Onyń denesinde 52 ımplant bar. Olar sonymen qatar adam denesine ornalastyrýǵa bolatyn eń úlken magnıtti qamtıdy. Áıel ózin «kıborg» dep sanaıdy.

Denesine salynǵan chıpterdiń kómegimen áıel kompıýterdi qosyp, onyń kodyn asha alady. Anastasııa bul ıdeıaǵa qyzynyń arqasynda qyzyǵýshylyq tanytqanyn aıtty.

«Qyzym denesine mıkrochıp ornatsa, oıyndaǵy qyzdar sııaqty kompıýterdiń kodyn asha alatynyn aıtyp, ruqsat surady. Al men ony aldymen ózim qoldanyp kórip, qaýipsiz ekenin anyqtaýym kerek dedim», - dedi ol.

Áıel ımplantanttar oǵan altynshy sezim beretinin aıtty.

«Men sizge sizdiń mıkrotolqyndy peshińiz kóp radıatsııa shyǵaryp jatqanyn aıta alamyn. Ol kezde meniń qolym dirildeıdi», - deıdi.

Anastasııa qabyrǵanyń artyndaǵy elektr symdaryn da seze alady.

Ol tipti ımplanttaryn paıdalanyp telefon soǵa alady.

«Sol bilegim qyzyma, oń bilegim kúıeýime qońyraý shala alady», - deıdi áıel.

Anastasııa denesine ımplanttardy ózi salǵanyn, keıbirine medıtsınalyq kómek alǵanyn aıtty.

Biraq rekordshy deneni ımplantatsııalaý qaýpi týraly da eskertti.

«Eger mende únemi baqylaýdy qajet etetin aýrý bar ekenin túsinsem, denemdegi barlyq ımplanttardy alyp tastar edim», - deıdi ol.