Denesi jyrtylǵan, tistelgen: ShQO-da aıýdan zardap shekken er adamnyń jaǵdaıy belgili boldy
ÓSKEMEN. KAZINFORM – Shyǵys Qazaqstan oblysy Rıdder qalasynda aıý 58 jastaǵy turǵynǵa shabýyldaǵan. Birneshe jerindegi súıegi synyp, denesinde jyrtylǵan jáne tistelgen jaraqattar kóp bolǵan ol aman qaldy. Qazir ol aýrýhanadan shyǵarylyp, úıine jiberildi.
Oqıǵa 29 shildede bolǵan. Er adam Rıdder qalalyq aýrýhanasynyń travmatologııa bólimine aýyr jaǵdaıda jetkizilgen.
Qalalyq aýrýhananyń bas dárigeriniń orynbasary Ardagúl Baıysbaevanyń aıtýynsha, aıý er adamnyń basynan, qolynan jáne sol aıaǵynan jaraqattaǵan.
- Naýqastyń eki qolynyń saýsaqtary men sol jaq baltyry syndy. Sonymen qatar basynda, eki bilegi men qolynda, sol jaq baltyrynda kóptegen tistelgen-jyrtylǵan jaraqattar boldy. Bul aýyr dárejedegi jaraqattar, - dedi ol.
Er adam 19 tamyzǵa deıin statsıonarda em qabyldaǵan. Qazir ol úıinde, ómirine eshqandaı qaýip tónip joq.
Oqıǵa Rıdder qalasynyń mańyndaǵy omartada bolǵan. Er adam jalǵyz bolmaǵan. Oǵan aıýdan qorǵanýǵa birge bolǵan eki adam kómektesken. Osydan keıin jyrtqysh ormanǵa qaraı ketip qalǵan. Aıýdyń adamǵa shabýyl jasaýyna naqty ne sebep bolǵany ázirge belgisiz.
Bul jaǵdaı Shyǵys Qazaqstanda aıýlardyń eldi mekenderge jıi jaqyndaı bastaǵanynyń taǵy bir dáleli bolyp otyr. Buǵan deıin óńirdiń birneshe aýdanynan jyrtqysh ańdardyń eldi meken mańynda júrgeni týraly habar túsken. Osyǵan baılanysty Jedel áreket etý jasaǵynyń ınspektorlary túngi kezekshilikke kóshken.
Aıýlar Úlken Naryn, Asýbulaq aýyldarynda jáne Rıdder, Serebrıansk qalalarynda baıqalǵan. Tipti Óskemende de túz taǵylarynyń biri Ablaketka shaǵyn aýdanyndaǵy SES-tegi aılaq mańyndaǵy beınebaqylaý kamerasyna túsip qalǵan.
