Denesinde jara bar: Semeıde jańa týǵan náreste Astanaǵa sanıtarlyq avıatsııamen jetkizildi

SEMEI. KAZINFORM – Semeı qalasynda jańa týǵan shaqalaqtyń jaǵdaıy qıyndap, ota jasaldy.

Kesheli beri BAQ-ta jáne áleýmettik jelide Semeıde jańa týǵan náresteniń perzenthanada kúıip qalǵany jaıly aqparat tarady. Soǵan qatysty Abaı oblystyq Densaýlyq saqtaý basqarmasynan jaýap berdi.

- Náreste 2 naýryzda saǵat 00.50-de 39 apta 2 kúninde týdy. Salmaǵy - 4150 gramm. 40 mınýttan soń ol neonataldy qarqyndy terapııa bólimshesine «Jańa týǵan nárestedegi tynys alý buzylystary» dıagnozymen aýystyryldy. 3 naýryzda balada tyryspa (sýdoroga) paıda boldy, - delingen aqparatta.

Vedomstvo dereginshe, júrgizilgen zertteýlerde sýbdýraldy jáne oń jaq qabyrǵanyń mıishilik gematomasy anyqtalǵan. Eki kúnnen keıin ota jasalyp, gematoma alynyp tastalǵan.

- Otadan keıin balanyń terisinde jara bar ekeni anyqtalǵan. Ol kúıikten bolatyn jaraǵa tán emes. Sebebi jara ary qaraı taralyp ketti. 11 naýryzda respýblıkalyq mamandarmen telekonsýltatsııa qorytyndysy boıynsha aldyn ala dıagnoz qoıyldy: 3 jáne 4 dárejeli qarynshaishilik qan ketý, jańa týǵan náresteniń fýlmınantty pýrpýrasy. Náreste Astanaǵa sanıtarlyq avıatsııamen jóneltildi. Onda terini tekserý, dıagnozdy naqtylaý jáne keıingi em taǵaıyndaý úshin qosymsha tekserý júrgiziledi, - delingen habarlamada.

Eske salsaq, buǵan deıin Abaı oblysynda áıel men náresteniń ólimine qatysty sotqa deıingi tergeý bastalǵany habarlanǵan.