Denesin ótkir zatpen kesken AMÓZ qyzmetkeri aýrýhanaǵa jetkizildi

ATYRAÝ. KAZINFORM – Atyraý munaı óńdeý zaýytynyń 4-razrıadty jóndeýshisi jumys isteýden bas tartyp, denesin ótkir zatpen kesken. Ol jedel járdem kóligimen aýrýhanaǵa jetkizilgen. 

Bul derekti Atyraý munaı óńdeý zaýytynyń baspasóz qyzmeti rastady. Oqıǵa búgin, 3 aqpanda bolǵan. 

– Mehanıkalyq jóndeý tsehynda jylý oqshaýlaýǵa baılanysty arnaıy top quryldy. Tseh basshysy burynnan bar brıgada quramynan oqshaýshylar tobynda jumys isteıtinderdiń tizimin jasaqtaǵan. Atalǵan tizimge 4-razrıadty jóndeýshi N.A. engizildi. Biraq búgin, 3 aqpanda ol jańadan qurylǵan brıgada quramyna tapsyrylǵan jumysty oryndaýdan bas tartty. Atalǵan tseh basshysy jóndeýshiniń jylý oqshaýshylar brıgadasynda jumys isteýden bas tartqany týraly baıanhat jazyp, burynǵy brıgadaǵa qaıtardy. Soǵan qaramastan, jóndeýshi tikeleı basshysynyń sheshimimen kelispeı, óziniń ómirine zııan keltirýge oqtaldy, - dep habarlady kásiporynnyń baspasóz qyzmeti. 

Belgili bolǵandaı, jóndeýshi ótkir zatpen asqazanynyń tusyn kesken. Ol jedel járdem brıgadasynyń kóligimen aýrýhanaǵa jetkizildi. Dárigerler oǵan medıtsınalyq kómek kórsetti. 

– Qazir jóndeýshiniń ómirine tónip turǵan qaýip joq. Ol jumysyn jalǵastyra beredi, - dedi kásiporynnyń baspasóz qyzmetinen.

Eske sala ketelik, budan buryn Atyraý munaı óńdeý zaýytynyń eks-dırektoryna 6,9 mln teńge aıyppul salynǵanyn jazǵan edik.