Denesin muzdatqyshta saqtaǵan: Aqtóbede dáriger ólimine qatysty is qaralyp jatyr
AQTÓBE. KAZINFORM – Nefrolog Abaı Aısaǵalıevti 31 jastaǵy meıirger óltirdi degen kúdikke ilikti. Aıyptalýshy sotta kinásin moıyndap, isti Alqa bılerdiń qatysýymen qaraýdy surady.
Oqıǵa bıyl mamyr aıynda boldy. Arada úsh aı ótkende tergeý jumystary aıaqtalyp, is Aqtóbe oblystyq qylmystyq ister jónindegi mamandandyrylǵan aýdanaralyq sotyna tústi. Meıirgerge Qylmystyq kodekstiń «Adam óltirý», «Urlyq» baptary boıynsha aıyp taǵyldy.
Іs materıalyna súıensek, jábirlenýshi men aıyptalýshy qaladaǵy jeke klınıkanyń birinde jumys istegen. Birneshe jyl boıy jaqyn aralasyp, aıyptalýshy nefrolog Abaı Aısaǵalıevtiń jalǵyz ózi turatynyn, bank esepshotynda qomaqty qarjy bar ekenin bilip alǵan.
– Qylmysty aldyn ala josparlap, 2025 jyldyń 1-31 qańtary aralyǵynda Qytaı saıty arqyly sılıkon maskaǵa tapsyrys beredi. 19 mamyr kúni aıyptalýshy áriptesi Abaı Aısaǵalıevtiń kózine ota jasatý úshin Astana qalasyna baratynyn biledi. 24 mamyrda túnde onyń Aqtóbege keletinin bilip, aıyptalýshy sol úıge qaraı baǵyt alady. Aısaǵalıev esh oılanbastan esigin ashady. Sol kezde aıyptalýshy as bólmesine Aısaǵalıevtiń keýde tusyna úsh ret pyshaq suǵyp alady. Qulaǵan kezde basynan baltamen urady. Aısaǵalıev ókpe, júregi zaqymdanyp, kóp qan joǵaltyp, qaıtys bolady. Aısaǵalıevtiń ólgenin bilse de onyń qolyn baılap, basyna paket kıgizedi. Keıin denesin muzdatqyshqa salyp tastaıdy, - dedi sot aldy tyńdaý kezinde prokýror Gúlzıra Kósherbaeva.
Odan keıin aıyptalýshy úıdegi bank kartasy, eki uıaly telefon, noýtbýk, platshetti sómkege salyp, alyp ketedi. 2025 jyldyń 25 mamyry kúni aldyn ala satyp alǵan sılıkon maskany kıip, A.Aısaǵalıevtiń esepshotynan 900 myń teńge aqshasyn alady. 27 mamyr kúni júk tasymaly qyzmetin paıdalanyp, «et toly muzdatqyshty garajǵa jetkizý» qyzmetine júginedi. Keıin taǵy birneshe ret bankomattan aqsha alady. Jalpy kólemi 5 268 000 teńge aqshany qaltasyna basyp, garajdaǵy muzdatqyshty ózge mekenjaıǵa tasymaldaý qyzmetine júginedi. Eki jaǵdaıda da júk tasymaldaýshylar muzdatqyshtyń ishinde ne bar ekenin naqty bilmegen. Sebebi ony jabý úshin aıyptalýshy skoch paıdalanǵan.
– Men kinámdy tolyq moıyndaımyn jáne ókinemin. Biraq meniń aram oıym bolmady, qasaqana jasamadym. Qylmystyq kodekstiń 99 baby 2 bóligi 8 tarmaǵyn 99 baptyń 1 bóligine aýystyrýdy, iske Alqa bılerdi qatystyrýdy suraımyn, - dedi aıyptalýshy.
Jábirlenýshi tarap kelispeı, taǵy birge tarmaqty qosýdy surady. Sebebi qylmystyq is kezinde birneshe zergerlik buıymdary joǵalǵan jáne ol aıyptalýshydan tabylǵan ári asa qatygezdikpen óltirgen dep túsindirdi.
Eske salsaq, nefrolog Abaı Aısaǵalıevtiń týystary ony 23 mamyr kúni úıden shyǵyp, qaıta oralmaǵanyn polıtsııaǵa habarlaǵan. Eriktiler de izdeý jumystaryn júrgizdi. 31 mamyr kúni polıtsııa dárigerdiń denesi tabylǵanyn, tergeý júrip jatqanyn aıtty.