Denesin karerge tastaǵan: Aqtóbede adam ólimine qatysty is sotta qaralyp jatyr
AQTÓBE. KAZINFORM – Aqtóbede er adamdy pyshaqtap óltirip, keıin denesin butarlaǵan eki aıyptalýshynyń isi sotta qarala bastady. Olardyń biri adam óltirse, ekinshisi denesin bólshektep, aıaq-qolyn karerge, denesin tońazytqyshqa jasyryp qoıǵan.
Aqtóbe oblystyq qylmystyq ister jónindegi mamandandyrylǵan aýdanaralyq sotynda sottalýshy Konstantın Panaskın men Mıhaıl Lýkınge qatysty is qaralyp jatyr. 38 jáne 40 jastaǵy aıyptalýshylarǵa Qylmystyq kodekstiń «Adam óltirý» jáne «Qylmysty jasyryp qalý» baptary boıynsha aıyp taǵyldy. Aıyptaý aktisine súıensek, 2024 jyldyń 25 qyrkúıegi kúni saǵat shamamen 23:00 shamasynda Panaskın óziniń tanysy Mıhaıl Lýkın turatyn kópqabatty úıge barady. Sol kezde olar ishimdik ishýge kelisedi. Ekeýi úıge kirgende, páter ishinde olardyń ortaq tanysy 43 jastaǵy Denıs Kýzmenkony kóredi. Sol arada barlyǵy ishimdik ishedi.
— 2024 jyldyń 26 kyrkúıegi kúni saǵat túngi 01:30–da ishimdik iship, Kýzmenko men Panaskın arasynda janjal bolady. Olar ottyqtyń kim alǵanyn bilmeı, sózge kelgen. Kýzmenko ony Panaskınnen kóredi. Sol kezde Kýzmenko sózge keledi. Óz kezeginde buryn isti bolǵan Panaskın sózdi kótere almaı, qorlandym dep sanaıdy. Kýzmenkony judyryǵymen urady. As úı ústelinen pyshaq alyp, Kýzmenkonyń ishine suǵyp alady. Kýzmenko oqıǵa ornynda qaza tapty. Keıin Lýkın Kýzmenkonyń qımylsyz qalǵanyn kóredi. Degenmen Lýkın de, Panaskın de alǵashqy medıtsınalyq kómek kórsetpedi. Jedel járdem shaqyrmady, polıtsııaǵa habar bermedi. Olar páterden shyǵyp ketedi, - dedi memlekettik aıyptaýshy Jenıa Kabdysheva.
Keıin túnde, ıaǵnı, 27 qyrkúıek kúni saǵat 03:00–de Lýkın anasyna tıesili páterge qaıta keledi. Ol Kýzmenkonyń ólimin jasyrmaq bolyp, túrli oıǵa keledi. Sóıtip Kýzmenkonyń denesin bólshektep, ony ártúrli jerge laqtyrýdy josparlaıdy.
— Lýkın qylmysty jasyrý úshin as bólmede jatqan deneni vannaǵa aparady. Keıin as úı pyshaǵymen butarlaıdy. Aldymen aıaq-qolyn bólshekteıdi. Ony sómkege salyp, Hromtaý qalasyndaǵy karer aýmaǵyna aparyp tastaıdy. Sodan soń úıine qaıta kelip, Kýzmenkonyń denesiniń qalǵan bóligin bólshektep, paketke salyp, ıis shyqpas úshin tońazytqyshqa salyp qoıady. Lýkın vannanyń ishin hımııalyq qospalarmen tazalaıdy, sýyn aǵyzyp jiberedi. Keıin páterden ketip qalady. Konstantın Panaskınge Qylmystyq kodekstiń 99 baby 1 bóligi, Mıhaıl Lýkınge Qylmystyq kodekstiń 432 baby aıasynda aıyp taǵylady, - dedi memlekettik aıyptaýshy.
Sot otyrysyna aıyptalýshy Mıhaıl Lýkınniń anasy da qatysty. Ol ózgege emes, balasynyń ózine de zábir kórsetkenin aıtty.
— Balam alǵashynda jaqsy bala boldy. Ony qorǵap, qolpashtap júrdim. Іsti bolmas úshin birneshe ret buzýshylyqtardy jasyrdym. Menen únemi aqsha da talap etti. Oqıǵa bolǵan kúni men úıde bolmadym. Úıde tynyshtyq bermeı, mýzykanyń daýysyn qatty shyǵaryp qoıdy. Sodan ketip qalyp edim. Bir kúni maǵan polıtsııa kelip tur. Janynda balam júr. Ol páter kilti joq dep ótirik aıtyp, meni páterge erte bardy. Sol kezde polıtsııa páter ishin qarap, as bólmege de kirdi. Jolda turǵan tońazytqyshty ashyp, tez japty. Tergeýshi maǵan «áje, sizge qaraýǵa bolmaıdy» dep eskertketimen, men kózin ala bere ashtym. Al ol jerde adamnyń denesi boldy. Basy da bolǵan dep aıtty maǵan keıin. Áli kúnge deıin esimnen ketpeıdi bul sumdyq, - dedi aıyptalýshynyń anasy Lıýbov Lýkına.
Eske salsaq, byltyr qyrkúıekte Aqtóbeniń Hromtaý aýdanynda er adamnyń denesi tabyldy. Alaıda bul is kópshilikke qazan aıynda belgili boldy.