Denesine sýret saldyratyndardyń minezi buzylǵan - ǵylymı zertteý
ASTANA. QazAqparat - Denesine sýret saldyrý sońǵy jyldary beleń alyp ketkeni belgili. Buryn ony kóbinese túrmede jazasyn óteýshiler men baıkerler ǵana jasatatyn. Qazir kóp adamdar denesine sýret salǵyzatyn boldy. Kembrıdjdegi Englııa Raskın Ýnıversıteti ǵalymdarynyń júrgizgen jańa zertteýi «tatý» jasatqan adamdardyń kópshiligi agressıvti jáne búlik týdyrýǵa beıim ekendigin kórsetti, dep habarlady The Daily Mail.
Zertteýge 20-58 jas aralyǵyndaǵy 378 (181 áıel, 197 er adam) adam qatysty. Olardyń 97-sinde «tatý» bolǵan. Zertteýshiler tatý jasatpaǵan adamdarǵa qaraǵanda, ony jasatqan adamdarda shalt minez, pıǵyly búlik shyǵarýǵa basym ekenin baıqaǵan. Ǵalymdar eki top arasyndaǵy bilim jáne áleýmettik mártebe deńgeıindegi aıyrmashylyqty anyqtamady. «Tatý» jasatqan adamdar ashýshań bolyp shyqty. Zertteýshiler búlikshil adamdardyń teris emotsııalary olarǵa tatý jasatýǵa májbúrleýi múmkin dep boljady.
