Denesin kúıik shalǵan 7 jastaǵy Nıkolaı Kessen kelesi otaǵa daıyndalyp jatyr

Balaǵa 3 aı buryn Hangan SonSım emhanasynda Ońtústik Koreıalyq hırýrgtar moıny men betine óz terisimen qosa jasandy teri japsyrǵan bolatyn.

Balanyń emdelýine qaıyrymdy halyq 70 myń AQSh dollaryn jınap bergen edi.

Mamandar qazir jasandy teri balanyń aǵzasyna jaqqanyn aıtty.

«Nıkolaı osymen 3 ret otadan ótti. Balanyń ıyǵy men qolyna, qol basyna Astanada eki ota jasaldy. Naýryzda Seýldegi medıtsınalyq ortalyqta balanyń moıny men ıegine ota jasaldy. Úsh ota da sátti ótti deýge bolady. Kelesi ota balanyń keýdesine jasalady. Ol da kúzde Seýlde ótedi. Kolıa qazir soǵan daıyndalyp jatyr. Otalardyń arqasynda bala qolyn kótere bastady. Qolymen zattardy ustaıtyn dárejege jetti. Onyń taǵdyry kópshilikke málim bolǵan soń Qazaqstannyń túkpir-túkpirinen habarlasyp, adamdar kómek qolyn sozyp jatty. Balaqaı ózin juldyzbyn dep qoıady», - dedi «Kovcheg» balalar úıiniń dırektory Marına Sýgakova.

7 jastaǵy balaqaı qazir «Kovcheg» balalar úıinde turyp jatyr.

Onyń aýyr taǵdyry jaıly osydan birneshe aı buryn Arýjan Saın dabyl qaqqan bolatyn. Qoǵam qaıratkeri denesiniń 50 paıyzyn kúıik shalǵan 7 jastaǵy balanyń jaǵdaıyn aıtyp, kópshilikten kómek suraǵan edi. 3 jyl buryn úı ishindegi pesh jarylyp, 4 jastan asqan bala shoqqa kúıip qalǵan edi.

Keıinirek bul isti Almaty oblysynyń ákimdigi jiti baqylaýyna aldy. Belgili bolǵandaı, balanyń anasy ishimdikke salynyp ketken.

Balamen qazir logoped, psıholog mamandar jumys jasap jatyr.

Tárbıeshiler qatarynan qaldyrmaý úshin balany keler jyldan bastap jalpy bilim beretin mektepke bermek.