Denesin qabyrshaq basqan qyzylordalyq balǵynǵa 2 500 000 teńge jınaldy

ASTANA. QazAqparat - Qyzylordalyq bes jasar balǵyn ıhtıoz dertiniń sırek túrimen aýyratyny qazaqstandyq BAQ-ta talaı jazyldy. Osydan keıin balanyń jaǵdaıyna beı-jaı qaraı almaǵan Qazaqstandyqtar qarjylaı kómek jınaı bastady. Sóıtip kóptiń kómegimen 2 500 000 teńge jınaldy. Qazir denesin qabyrshaq basqan Jasulan Qorǵanbektiń densaýlyǵy ońala bastady, dep habarlaıdy «7-arna».

Qazir Jasulandy Almatyda teri-venerologııalyq ınstıtýt mamandary tekserýde. Al anasy jaqyn kúnderi ulyn sheteldik dárigerlerge qaratpaq. Balǵynnyń teri-venerologııalyq ınstıtýtyna kelgenine nebári úsh kún ǵana bolsa da, denesiniń 50 paıyzy qabyrshaqtardan tazarǵan. Al Jasulannyń anasy almatylyq dárigerlerdiń emdeý ádisi burynǵydan ózgeshe ekendigin ańǵarǵan. Eger áý bastan osylaı emdegende balam dertinen qulan taza aıyǵyp keter me edi deıdi anasy. Endi Ulbıbi balasyn ázirbaıjandyq mamandarǵa aparyp emdetpek. Onda dárigerler ıhtıozdy naftalandy munaımen emdeıdi eken. Jınalǵan eki jarym mıllıon teńgeni osy emge jumsaımyz deıdi ol. Álemdik medıtsınada ıhtıozdyń mundaı túri óte sırek kezdesedi eken. 200 myń adamnyń ishinde bireýi osyndaı dertke shaldyǵady. Qazir Jasulannyń otbasy sheteldik dárigerlerge kóriný úshin áli de qarajat jınastyryp jatyr.