Denesin bólshektep tastaǵan: Polıtsııa Aıajan Edilovanyń ólimine qatysty túsinik berdi

ALMATY. QazAqparat- 19 jastaǵy almatylyq Aıajan Edilovany óltirgen kúdikti óz-ózine qol jumsamaq bolǵan. Búgin Almaty qalalyq Polıtsııa departamentiniń arnaıy brıfınginde oqıǵanyń mán-jaıy aıtyldy, dep habarlaıdy QazAqparat tilshisi.

Almaty qalalyq Polıtsııa departamentiniń resmı ókili Saltanat Ázirbektiń sózinshe, kúdikti jasyrynǵan páterden qaıtys bolǵan stýdent qyzdyń denesiniń bólshekteri tabylǵan.

«Kúdiktini ustaý kezinde ol óz-ózine qol jumsamaq bolyp denesin jaraqattaǵan. Biraq onyń bul áreketi iske aspady. Oqıǵa ornyna dárigerler shaqyrtylyp, ustalǵan adam №7-shi aýrýhanaǵa jetkizildi. Ony táýlik boıy kúzetedi. Aıyqqannan keıin kúdikti tergeý ızolıatoryna aýystyrylady. Kúdiktiniń aıtýynsha, Aıajan ekeýiniń arasynda janjal týyp, sosyn ol ony óltirip, qylmystyń izderin jasyrýǵa tyrysqan. Osy maqsatty kúdikti qyzdyń denesin bólshektegen. Dene bólshekterin qalanyń ár jerine laqtyryp úlgergen. Sot oǵan qatysty qamaýǵa alý túrindegi sharany qabyldady. Tergeý júrip jatyr»,- dedi Saltanat Ázirbek.

Buǵan deıin, Almatyda iz-túzsiz joǵalǵan 19 jastaǵy boıjetkenniń denesi tabylǵany týraly habarlaǵan bolatynbyz.

Almaty qalalyq Polıtsııa departamenti taratqan málimetke sáıkes, 20 naýryz kúni qyzdyń ápkesi polıtsııaǵa júginip, sińlisiniń joǵalyp ketkenin habarlaǵan. Boıjetkendi izdeý úshin arnaıy jedel tergeý toby quryldy.

Іzdeý jumysy kezinde qyzdyń sol kúni áleýmettik jelide tanysqan jigitpen kezdesýdi josparlaǵany anyqtaldy. Keıin belgili bolǵandaı, boıjetken sol beıtanys jigittiń qylmystyq áreketinen qaza tapqan.

Kúdikti - 1993 jyly týǵan Túrkistan oblysynyń turǵyny.