Denesin 94 paıyz kúıik shalǵan Áselim Nyǵmetova: qolushyn sozǵandardyń bárine alǵys aıtamyn

Bul oqıǵa ótken jyldyń 18 qarasha kúni Zachagan kentindegi turǵyn úıde bolǵan edi. Gaz jarylysynan 37 jasar Áselimniń denesin túgelge jýyq kúıik shalǵan-dy.

-Alty aı ýaqyt boıy Samara qalasyndaǵy N.Pırogov atyndaǵy №1 qalalyq klınıkalyq aýrýhananyń №11 kúıik jaraqaty bólimshesinde emdeldim, - dedi Áselim. Alla dep aıtaıyn, otbasyma oralyp, úı ishi tirshiligine aralasyp jatyrmyn.

Samaradaǵy atalǵan medıtsınalyq mekemede emdeý deńgeıi óte joǵary. Ásirese, bólimshe meńgerýshisi, professor Konstantın Aleksandrovıch Fılımonovtyń biliktiligin atap aıtar edim. Áriptesteri arasynda bedeldi, izdenimpaz jan eken. Kabınetinde turǵan marapattardan-aq onyń qandaı maman ekendigin ańǵarýǵa bolady. Germanııada, Qytaıda bolyp, biliktiligin jetildirgen.

Oralda, oblystyq klınıkalyq aýrýhananyń jansaqtaý bóliminde jatqanymda, týystarym meni qutqarýdyń barlyq jolyn qarastyryp, osy professordy aldyrtqan eken. Sonyń aldynda meniń denemdi 80-85 paıyz kúıik shalǵan degen eken. Ol kisi qarap, «Denesin 94 paıyz kúıik shalǵan, tiri qalýyna tek 5 paıyz múmkindik bar» degen. Oraldyq dárigerler de jansaqtaý sharalaryn durys jasap, sonyń nátıjesinde bótekem aman qaldy.

-Áselim, óziń qaı kezden bastap es jınadyń?

-Maǵan barlyǵy on bes shaqty ota jasaldy. Basymnan alty ret teri alyp, jamady. Professor dárigerim meni alǵash ret qytaılyq ádispen emdedim dedi. Tańerteńnen túngi saǵat 3-ke deıin sıstemada jattym. Neshe túrli dáriniń áserinen shyǵar, bastapqyda bir aı boıy uıyqtaı berippin. Oıanǵanymda, kim ekenimdi bile almadym. Tek kúıeýim qasymda otyrǵannan keıin ǵana esime túsirdim. Eki aı boıy tamaǵymda IVL degen tynys alý apparaty turǵandyqtan, sóıleı almadym. Ol apparatty qańtardyń 14-i kúni ǵana aldy. Oǵan deıin kúıeýim Rýslanmen uıaly telefondaǵy áripterdi kórsetý arqyly tildestim.

-Áselim, sol kezde búkil Oral jurtshylyǵy seniń tileýińdi tiledi. Qaınyń Erlan Nyǵmetov arqyly biz de habarlasyp turdyq. Emdelýge shamamen 5 mln teńgedeı qarajat kerek degennen keıin ózińniń áriptesteriń - muǵalimder qaýymy, basqa da halyq qolushyn sozdy. Ol jóninde ne aıtar ediń?

-Meniń taǵdyryma alańdaǵan jáne jomart adamdardyń bárine alǵystan basqa aıtarym joq. Ózim 17 jyl boıy ustazdyq etip kelemin, bastaýysh synyp muǵalimimin. Áýeli J.Dosmuhamedov atyndaǵy pedkolledjdi, sodan keıin M.Ótemisov atyndaǵy Batys Qazaqstan memlekettik ýnıversıtetin qazaq tili men ádebıeti mamandyǵy boıynsha bitirdim.  2012 jyldan beri Halyq qaharmany Hıýaz Dospanova atyndaǵy №30 mektepte eńbek etip kelemin. Qos ulymyz Ańsar men Almas osynda oqıdy. Bireýi jetinshi, ekinshisi 3-synypqa kóshti.

Qıyn kezde maǵan kómektesip, qarjy jınaýdy uıymdastyrǵan Oral qalalyq bilim berý bóliminiń basshysy Jansulý Meńeshqyzy Tóremuratovaǵa, balalaryma, otbasyma kómektesken №30 mektep dırektory Raıgúl Tasbolatqyzy Imanǵalıevaǵa, barsha áriptesterime rızashylyǵymdy bildiremin. Sondaı-aq týma-týys, dos-jaran, kórshilerdi qospaǵanda, «Oralavtotrans» JShS júrgizýshilerin, balalarym jattyǵyp júrgen kıokýshınkaı-kan karate mektebin, «Kondenat», «Jaıyqmunaı», «Jelaev nan zaýyty» kompanııalaryn, Zachagan ákimdigi men Novenkıı aýylyn aıta ketkim keledi. Tipti Astanadan tanymaıtyn adam 1 mln teńge aýdarǵan. Mine, halyqtyń osyndaı tileýi men kómegi shyǵar, meniń aman qalǵanym. Sol úshin bárine rızamyn.

-Áserli áńgimeń úshin rahmet, al endi súıikti mamandyǵyńa túbi oralatyn shyǵarsyń?

-Iá, árıne. Qazir І top múgedektigin berdi. Zachagan kentindegi №6 emhanada emimdi jalǵastyryp júrmin. Táýir bolǵannan keıin 1-2 jylda muǵalimdik jumysqa oralamyn dep oılaımyn. Joldasym Rýslan Nyǵmetov №12 baǵytta avtobýs aıdaıdy. Úıimizdi jóndep aldyq. Uldarym, týystarym qasymda, budan artyq qandaı baqyt kerek!

Eske sala keteıik, Áselim Nyǵmetovanyń Samarada emdelip jatqanyn kezinde jazǵan bolatynbyz.