Dene shynyqtyrýmen aınalysatyn balalar sanyn 2 ese arttyrý qajet - Kólginov
ASTANA. QazAqparat – Dene shynyqtyrýmen aınalysatyn balalar sanyn 2 ese arttyrý qajet. Bul týraly Premer-Mınıstrdiń orynbasary Altaı Kólginov aıtty, dep habarlaıdy QazAqparat tilshisi.
«Sportty damytýǵa arnalǵan jańa tujyrymdamany jedeldetýimiz qajet. Bul jańa tujyrymdamada búkil kórsetkishter, aldymyzda turǵan maqsat-mindetter kórsetilýi tıis. Ásirese, jasóspirimder, jastardy sportqa baýlý, onyń ishinde kásibı sportshylarymyzdy damytý máseleleri qamtylýy qajet. 2023, 2024 jyldary, jalpy aldaǵy 7 jyldyq merzimde qandaı nátıjege qol jetkizýimiz kerektigi tujyrymdamada belgilenýi kerek», - dedi Úkimet basshysynyń orynbasary Mádenıet jáne sport mınıstrliginiń keńeıtilgen alqa otyrysynda.
Sonymen qatar vıtse-premer sport máselesi boıynsha ázirlenetin zań jobasynda balalar sportyn damytý máselesine erekshe nazar aýdarylýy tıistigin atap ótti.
«Aldymyzda dene shynyqtyrýmen aınalysatyn balalar sanyn 2 esege arttyrý mindeti tur. Bul bizdiń qolymyzdan keletin mindet. Ol úshin birlesip jaǵdaı jasaýǵa tıispiz. Memlekettik sporttyq tapsyrysty tııanaqty iske asyrý mańyzdy. Osynda aıtylǵan usynystardy jan-jaqty pysyqtaý qajet. Bireýler básekelestikke jol berý kerektigin aıtty. Ol da durys. Kemshilikter bar. olardy da sheshý qajet. Munyń bárin jergilikti atqarýshy organdarmen pysyqtańyzdar. Sodan keıin tıisti sheshim qabyldaý kerek», - dedi Altaı Kólginov.
