Dene shynyqtyrýdan sabaq berip kelgen basqa pánder muǵalimderiniń isteri áshkere boldy - Bas prokýratýra
ASTANA. Qańtardyń 13-i. QazAqparat - Qaraǵandy oblysynyń prokýratýrasy birqatar aýdan mektepterinde dene shynyqtyrý sabaqtaryn arnaıy pedagogıkalyq jáne kásibı bilimderi joq mamandardyń, máselen, eńbek, tarıh, syzý pánderiniń muǵalimderi berip kelgenin anyqtady,
dep habarlaıdy QazAqparat Bas prokýratýraǵa silteme jasap.
Qaraǵandy oblysynyń prokýratýrasy jalpy bilim berý mektepterinde dene shynyqtyrý jáne sport týraly zańnamalardyń oryndalýyna tekseris júrgizip, nátıjesinde Qarajal qalasynyń mektepterinde dene shynyqtyrý jáne sport boıynsha pedagogıkalyq qyzmetke arnaıy bilimi joq mamandardyń tartylǵandyǵyn anyqtady.
Sondaı-aq Jańaarqa aýdanynyń Kóktal aýylynda atalmysh sabaqtan eńbek pániniń muǵalimi, Taldybulaqta - tarıh, Kenjebaı-Samaıda - syzý jáne Qyzyljarda tarıh pániniń muǵalimi tálim berip kelgeni málim boldy.
Onymen birge, Shahtınsk men Qarajal qalalaryndaǵy, Qaraǵandy qalasynyń Prıozersk jáne Oktıabrskıı aýdandaryndaǵy jekelegen mektepterde aptasyna ótkizilip turǵan dene shynyqtyrý sabaqtarynyń kólemi zańnamalyq talaptarǵa saı bolmaǵan.
«Sondaı-aq, tekseris barysynda jalpy bilim berý jáne ınternatty mekemelerde sanıtarlyq-epıdemıologııalyq talaptardyń oryndalmaıtyndyǵy anyqtaldy. Osy rette, oblystyq prokýratýra aımaqtyń Bilim berý basqarmasyna zańnama buzýshylyqtardy joıýǵa qatysty usynym túsirdi», - dep atap ótken Bas prokýratýranyń baspasóz qyzmeti.
Olardyń anyqtaýynsha, prokýrordyń usynymy qaralyp, zańnama buzýshylyqtar joıyldy. 17 laýazymdy tulǵa tártiptik jazaǵa tartyldy.
