Dene shynyqtyrý jáne sport salasyna bólingen bıýdjet qarajatynyń jumsalýy tekseriledi

ASTANA. QazAqparat – Qarjylyq monıtorıng agenttigi dene shynyqtyrý jáne sport salasyn damytýǵa bólingen memleket qarjysynyń urlanýynyń aldyn alý boıynsha jumys júrgizip jatyr, dep habarlaıdy QazAqparat.

Sporttyq-saýyqtyrý is-sharalarynyń, nysandardyń, qurama komandalardyń, buqaralyq sporttyq is-sharalardyń, federatsııalardyń reıtıngisi men qaýpi kórsetilgen tizim jasalady. Sondaı-aq salany qarjylandyrýdyń joldary men kólemi, onyń ishinde demeýshilik kómek kólemin anyqtaý baǵytynda jumys júrgizilip jatyr.

Agenttikte 2023 jyldyń 6 aıynda jalpy somasy 269,3 mln teńge zalaly bar 21 is tergelip jatyr.

Aıta keteıik, ashyq aqparat kózderinen alynǵan málimetterge sáıkes, 2019-2023 jyldar aralyǵynda sportty damytýǵa shamamen 300 mlrd teńge bólingen.

Agenttik taýarlar men qyzmetterdi joǵarylatylǵan baǵamen satyp alý, qyzmet kórsetýdiń naqty oryndalmaýy jáne basqa da buzýshylyqtar boıynsha taldaý júrgizedi. Jumys nátıjesinde sportty damytýǵa bólingen bıýdjet qarajatynyń urlanýyna jaǵdaı týǵyzatyn sebepterdi anyqtaý jáne mundaı zań buzýshylyqtardyń aldyn alatyn tetikterdi jetildirý boıynsha usynystar ázirleý josparlanyp otyr.

QMA memlekettik bıýdjet qarajatyn jymqyrý úshin qylmystyq jaýapkershilik qarastyrylǵanyn eskertedi.