Dene shynyqtyrý sabaǵyn UBT pánderiniń qataryna, joǵary oqý oryndarynda memlekettik emtıhanǵa engizý qajet - depýtat J. Álıev
ASTANA. 5 qyrkúıek. QazAqparat - Búgin Qazaqstan Respýblıkasy Parlamenti Májilisiniń tóraǵasy Nurlan Nyǵmatýlınniń basshylyǵymen ótken jalpy otyrysynda depýtat Jumataı Álıev Úkimet basshysynyń atyna depýtattyq saýal joldady.
Onda depýtat dene shynyqtyrý sabaqtarynyń saǵatyn kóbeıte otyryp, ony Ulttyq biryńǵaı testileý pánderiniń qataryna, joǵary oqý oryndarynda memlekettik emtıhanǵa engizý qajettigin kóterdi.
«Qazaqstannyń kók baıraǵyn jeti ret kókke kótergen Londandaǵy jetistikterimiz, buqaralyq sportty jańa zamanǵa sáıkes jańartýdyń jolyn kórsetip otyr. Sportty damyta otyryp kóptegen áleýmettik problemalardy sheshýge bolady. Atap aıtqanda, ortasha ómir súrý uzaqtyǵyn ulǵaıtý, aýrýlardyń aldyn alý, al eń bastysy, dene shynyqtyrý men sportty damytý - bul ulttyń bolashaǵy», - degen depýtat dene shynyqtyrý men sport salasyndaǵy memlekettik saıasatty iske asyrýdyń tıimdiligin arttyrý maqsatynda birqatar usynystar jasady.
Atap aıtqanda, J. Álıev 2013 jyldan bastap memlekettik bıýdjetten olımpıada oıyndarynyń barlyq túrlerinen sportshylardy daıarlaý úshin «Olımpıadalyq daıarlyq ortalyqtaryna» jyl saıyn jetkilikti qarjy bólýdi, dene shynyqtyrý sabaqtarynyń saǵatyn kóbeıte otyryp, ony Biryńǵaı ulttyq testileý pánderiniń qataryna, joǵary oqý oryndarynda memlekettik emtıhanǵa engizý qajettigin alǵa tartty. «Barlyq aımaqtarda (aýdandyq, qalalyq deńgeıde) ásirese aýyldyq jerlerde jeke sport basqarmalaryn qurý usynylady. Aýyldyq jerlerde jyl boıy jumys isteıtin sport ǵımarattaryn, sapaly qural-jabdyqtarmen qamtylǵan dene shynyqtyrý keshenderin salýymyz kerek. Sport ınfraqurylymynyń shyǵysyna bólinetin qarjyny kóbeıtip, «100 mektep» pen «100 aýrýhana» baǵdarlamasy sekildi 100 dene shynyqtyrý keshenderin salýdy qolǵa alsaq ıgi», - dedi ol.
