Dene shynyqtyrý pániniń 1,6 myń muǵalimi biliktilikti arttyrý kýrsynan ótedi – mınıstrlik

ASTANA. QazAqparat - Qazaqstanda dene shynyqtyrý páninen sabaq beretin 1 630 muǵalim biliktilikti arttyrý kýrstarynan ótedi. Kýrstardy Oqý-aǵartý mınıstrligine qarasty Ulttyq ǵylymı-praktıkalyq dene shynyqtyrý ortalyǵy uıymdastyryp otyr, dep habarlaıdy QazAqparat.

Atalǵan mınıstrliktiń baspasóz qyzmetinen málim etkendeı, tegin kýrstar 3 qazanda bastalyp, 2022 jylǵy 9 jeltoqsanǵa deıin jalǵasady. Sabaqtardyń birinshi legi Astana qalasynda, Qaraǵandy, Pavlodar, Jetisý, Soltústik Qazaqstan oblystarynda bastalyp ketti. Olarǵa 370 dene shynyqtyrý muǵalimi qatysyp jatyr.

«Dene shynyqtyrý páni muǵalimderiniń jumys sapasy men kásibı deńgeıin arttyrý maqsatynda biz ekinshi jyl qatarynan arnaıy ázirlengen kýrstardy ótkizip jatyrmyz. Byltyr bul kýrstan 950 muǵalim ótti. Búginde elimizdiń 5 óńirinde kýrstar bastaldy... Muǵalimderdiń suranysy negizinde oqytý eki tilde uıymdastyrylady. Ustazdarymyzdyń kásibı deńgeıin arttyrý – basty mindetterdiń biri», – dedi Ulttyq dene shynyqtyrý ǵylymı-praktıkalyq ortalyǵynyń bas dırektory Saǵdat Sadyqov.

Kýrstardy aıaqtaǵan muǵalimder test tapsyryp, memlekettik úlgidegi sertıfıkattar alady.

Foto: shutterstock.com