Demokrattar ushaqty syılyq retinde qabyldaǵan Trampty synǵa aldy

ASTANA. KAZINFORM — Qatardan ushaqty syıǵa alǵany týraly habarlar Demokratııalyq zań shyǵarýshylar tarapynan synǵa ushyrady, dep habarlaıdy The Hill. 

Olar muny Donald Tramptyń prezıdenttik bılikti jeke baıýy úshin paıdalanýynyń taǵy bir mysaly dep atady.

Birneshe BAQ-tyń habarlaýynsha, Tramp Qatar úkimetinen Air Force One-di (prezıdentti tasymaldaıtyn AQSh ÁÁK ushaǵy) almastyratyn Boeing 747 ushaǵyn alady jáne ol Tramptyń ókilettigi aıaqtalǵannan keıin bolashaq prezıdenttik kitaphanada saqtalady.

Ókilder palatasy baqylaý komıtetiniń múshesi Djeımı Raskın (Merılend demokraty) atalǵan kelisimdi «alaıaqtyq» dep atady.

— Tramp Qatardan 300 mln dollarlyq syılyqty qabyldaý úshin Kongress ruqsatyn alýy kerek. Konstıtýtsııa óte anyq: Kongrestiń ruqsatynsyz shet elden «kez kelgen túrdegi» syılyq alynbaıdy. Tórt jyl boıy qoldanyp, sodan keıin kitaphanańyzǵa ornalastyrylǵan syılyq áli de syılyq (jáne alaıaqtyq) bolyp qalady — dep jazdy Djeımı Raskın X-tegi jazbasynda. 

Senator Krıs Merfı (Konnektıkýt demokraty) ushaqty berý máselesi «qarastyrylyp» jatsa da, bul Tramp tusynda Amerıkanyń odaqtasy bolý úshin elderdiń ne isteý kerektigin meńzep otyr dep jazdy.

Óz kezeginde Tramp demokrattardy synady.

— Qorǵanys mınıstrligi 40 jylǵy Air Force One-di ýaqytsha almastyratyn 747 ushaqty jarııa jáne ashyq mámilede tegin, syılyqqa alý faktisi opasyz demokrattardy alańdatqany sonsha, olar bizden ushaq úshin úlken aqsha tóleýdi talap etedi. Muny kez kelgen adam jasaı alady! Demokrattar — álemdik deńgeıdegi beıbaqtar!!! — dep jazdy Donald Tramp Truth Social-da. 

Buǵan deıin Tramp jańa saýda kelisimi jasalǵanyn málimdedi.