Demokrattar Kongress saılaýy qarsańynda Tramp ákimshiligin sotqa berdi
ASTANA. KAZINFORM — AQSh-ta aralyq saılaýǵa eki apta qalǵanda Demokratııalyq partııa jetekshileri prezıdent Donald Tramp ákimshiligine shaǵymdanyp federal sotqa júgindi. Demokrattardyń kózdegeni prezıdent ákimshiliginiń shtattardaǵy saılaý naýqanyna áser etýine jol bermeý, dep habarlaıdy Kazinform agenttiginiń Vashıngtondaǵy menshikti tilshisi NBC News-ke silteme jasap.
Vashıngton sotyna túsirilgen talap aryzda Tramp ákimshiligine zańdy túrde tirkelgen saılaýshylardy tizimnen alyp tastaýǵa nemese daýys berýden shettetýge tyıym salatyn sot sheshimin shyǵarý talap etilgen.
Demokrat senator Chak Shýmer bastaǵan shaǵymdanýshylar prezıdent ákimshiligi 3 qarashadaǵy saılaý aldynda shtattardaǵy saılaý komıssııalarynyń qyzmetkerlerin sottatam dep zańsyz qoqan-loqqy jasady dep tanýdy talap etip otyr.
Talap aryzda AQSh Ádilet mınıstrliginiń Kalıfornııadaǵy jaqynda jasaǵan áreketteri baıandalǵan. Mınıstrlik shtattyń saılaý komıssııalarynyń qyzmetkerlerine federaldy úkimet AQSh azamaty bolmaýy múmkin dep tanyǵan adamdardyń poshtamen jiberilgen bıýlletenderin olardyń ımmıgratsııalyq mártebesi rastalǵanǵa deıin sanaýǵa tyıym salýdy talap etip sotqa shaǵymdanǵan bolatyn.
AQSh Ádilet mınıstrligi óz málimdemesinde saılaýdyń tutastyǵy ákimshilik úshin basty basymdyq ekenin jáne onyń bul turǵydaǵy áreketteri zań men sot isine negizdelgenin málimdedi.
Prezıdent ákimshiliginiń ústinen aryz túsirgenderdiń qatarynda Demokratııalyq partııanyń Senatqa saılaý jónindegi komıteti, Demokratııalyq partııanyń Kongreske saılaý jónindegi komıteti jáne Demokrat gýbernatorlar qaýymdastyǵy bar. Іs boıynsha sotta Tramp, AQSh Ádilet mınıstrligi, Bas prokýror Todd Blansh, AQSh Іshki qaýipsizdik mınıstrligi jáne Іshki qaýipsizdik hatshysy Markveın Mallın jaýapker tarap bolmaq.
Bul demokrattardyń Tramp bıligine qarsy sotqa júgingen alǵashqy aryzy emes. Máselen, byltyr Demokratııalyq partııanyń bas prokýrorlary AQSh prezıdenti Donald Tramptyń týa bitken azamattyqty alyp tastaý týraly jarlyǵyna baılanysty sotqa shaǵym túsirgen bolatyn.
Sondaı-aq, AQSh-tyń Nıý-Djersı shtatynda 2023–2024 jyldary shamamen 6600 AQSh azamaty emes adam baǵdarlamalyq qamtamasyz etýdegi qatelik saldarynan saılaýshylar tizimine qate tirkelgen.
AQSh-ta Donald Trampty qoldaý deńgeıi rekordtyq tómen kórsetkishke jetti.
