Demokratııany bireýdiń qarjysymen ornatýǵa bolmaıdy – Qasym-Jomart Toqaev
ASTANA. KAZINFORM – Memleket etnosaralyq kelisim men beıbitshilikke nuqsan keltiretin kez kelgen arandatýdyń jolyn kesip, qatań tosqaýyl qoıa bermek. Prezıdent Qasym-Jomart Toqaev Qazaqstan halqy Assambleıasynyń HHHІV sessııasynda osyndaı oı aıtty.
- Kúrish pen kúrmekti, konstrýktıvti syn men dálelsiz min taǵýdy, kóńilge tımeıtin parodııa men jıirkenishti qorlaýdy aıyra bilý mańyzdy. Zań aldynda bári teń. Sol sebepti biz elimizdegi etnosaralyq kelisim men beıbitshilikke nuqsan keltiretin kez kelgen arandatýdyń jolyn kesip kelemiz, budan ári de qatań tosqaýyl qoıamyz. Ózderin sóz erkindiginiń jaqtaýshysy retinde kórsetkisi keletin keıbir quqyq qorǵaý uıymdarynyń ókilderi, blogerler men jýrnalıster elimizdegi ár isten saıası, jaǵymsyz astar izdep, shyn máninde, arandatýmen aınalysyp júrgenin aıtpasqa bolmaıdy.
Bul Qazaqstannan kóship ketip, shetelde júrip halqymyzǵa shabýyl jasaıtyn, tipti, memlekettik organdardy bopsalaıtyn burynǵy azamattarymyzdyń áreketi. Olar shet memleketter bergen aqshany aqtaýǵa jumys istep júr. Búginde muny bári biledi. Demokratııany bireýdiń qarjysymen ornatýǵa bolmaıdy, - dedi Qasym-Jomart Toqaev.
Prezıdenttiń paıymdaýynsha, Qazaqstandaǵy demokratııa men sóz bostandyǵy úshin shetelde eshkimniń basy aýyryp, baltyry syzdamaıdy.
- Ony naqty túsingen jón. Jaqynda sheteldik úkimettik emes uıymdardyń áreketteri áshkerelendi. Sonda olardyń aram nıeti, ashkózdigi men Qazaqstanǵa jany ashymaıtyny anyq kórindi. Sondaı-aq keıbir tanymal qazaqstandyq grant alýshylardyń kóleńkeli áreketteri de belgili boldy. Qazaqstanda problema joq demeımiz. Árıne, basqa elderdegideı bizde de túıtkilder bar. Biraq biz ony áldekimderdiń ádistemesimen emes, ózimizdiń ulttyq múddemiz ben zańnama aıasynda sheshemiz.
Osyndaı qısyndy áreketterimizdi halqymyzdyń basym kópshiligi men nıeti adal halyqaralyq seriktesterimiz durys túsinetinine senimdimin. Ideologııalyq óshpendilik – bizdiń dúnıetanymymyzǵa múlde jat. Dástúrimiz ben qundylyqtarymyz, bolmysymyz ben ómir saltymyz ultymyzdy birtutas tarıhı-mádenı jáne saıası qaýym retinde biriktirip, tutastyǵyn bekemdeıdi, - dedi Memleket basshysy.
Aıta keteıik, elordadaǵy Táýelsizdik saraıynda Memleket basshysy Qasym-Jomart Toqaevtyń qatysýymen Qazaqstan halqy Assambleıasynyń kezekti HHHІV sessııasy ótip jatyr.
Keńeıtilgen otyrystyń kún tártibi — «Qazaqstan halqy Assambleıasynyń 30 jyldyǵy: qorytyndylar jáne bolashaq mindetter».