Demokratııalyq kúshterdiń «Qazaqstan-2050» jalpyulttyq koalıtsııasy Qazaqstan halqyna úndeý arnady
QURMETTІ QAZAQSTANDYQTAR!
Dál qazir elimiz mańyzdy tarıhı kezeńdi bastan ótkerýde.
Qazaqstannyń Tuńǵysh Prezıdenti, Elbasy Nursultan Ábishuly Nazarbaev Prezıdenttik ókilettigin toqtatý týraly sheshim qabyldady.
Qazaqstan Respýblıkasynyń Konstıtýtsııasyna sáıkes Qasym-Jomart Kemeluly Toqaev halyqqa ant berip, Qazaqstan Prezıdenti qyzmetine kiristi.
Parlamenttiń Konstıtýtsııaǵa ózgerister engizý týraly biraýyzdan qabyldaǵan sheshimine sáıkes Qazaqstan Respýblıkasynyń Prezıdenti Q.K.Toqaev Astanany Nur-Sultan qalasy dep qaıta ataý týraly tıisti Zańǵa jáne Jarlyqqa qol qoıdy.
Biz, Qazaqstannyń mıllıondaǵan azamattarynyń múddelerin bildiretin Demokratııalyq kúshterdiń «Qazaqstan-2050» jalpyulttyq koalıtsııasynyń músheleri, elimizdiń jetekshi saıası partııalarynyń, Qazaqstan halqy Assambleıasynyń, iri qoǵamdyq birlestikterdiń, úkimettik emes uıymdardyń ókilderi,
qazirgi tańda búkil álemge moıyndalǵan, dúnıe júzi qurmetteıtin táýelsiz Qazaqstannyń qalyptasýyndaǵy elimizdiń Tuńǵysh Prezıdentiniń asa kórnekti rólin moıyndaı otyryp;
Elbasynyń basty qundylyqtary adam, onyń quqyqtary men bostandyqtary bolyp tabylatyn Qazaqstandy egemendi, demokratııalyq, quqyqtyq jáne áleýmettik memleket retinde damytýǵa arnalǵan strategııalyq baǵytyn qoldaı otyryp;
Qazaqstan damýynyń negizin qalaýshy qaǵıdattar - qoǵamdyq kelisim men saıası turaqtylyqtyń, etnosaralyq jáne konfessııaaralyq beıbitshiliktiń, búkil halyqtyń ıgiligine baǵyttalǵan ekonomıkalyq ósýdiń jáne qazaqstandyq patrıotızmniń myzǵymastyǵyn qorǵaı otyryp;
el Prezıdentiniń bılik ókilettigin berýdiń demokratııalyq jáne quqyqtyq sıpatyn joǵary baǵalaı otyryp;
Elbasynyń Qazaqstannyń jańa elordasyn qurýdaǵy aıryqsha rólin, saıası erik-jigerin jáne orasan zor eńbegin ataı otyryp;
eldiń Tuńǵysh Prezıdentine Qazaqstan halqyna sińirgen eńbegi úshin zor qurmet pen alǵys bildire otyryp;
bolashaq urpaq aldyndaǵy óz jaýapkershiligimizdi sezine otyryp, tarıhymyzdyń osy bir mańyzdy kezeńinde Qazaqstan halqyna Úndeýimizdi joldaımyz.
Táýelsizdiktiń barlyq jetistikteri - Qazaqstannyń Tuńǵysh Prezıdentiniń kóshbasshylyǵy men barsha qazaqstandyqtardyń jalpyulttyq birligi, qajyrly eńbegi jáne umtylysynyń saltanaty.
Nursultan Ábishuly Nazarbaev qashanda bizdiń Elbasymyz, táýelsiz Qazaqstannyń negizin qalaýshy tulǵa, el ishinde jáne halyqaralyq arenada orasan zor bedelge ıe álemdik deńgeıdegi saıasatker bolyp qala beredi. Onyń erik-jigeri men tabandylyǵynyń arqasynda Qazaqstan Táýelsiz memleket bolyp qalyptasty.
Sondyqtan biz, Demokratııalyq kúshterdiń «Qazaqstan-2050» jalpyulttyq koalıtsııasynyń músheleri, Astana qalasyn Qazaqstan Respýblıkasynyń astanasy - Nur-Sultan qalasy dep qaıta ataýdy durys ári ýaqytyly sheshim dep esepteımiz jáne ony qoldaımyz. Bul sheshimdi tarıhı ádilettilik jáne Elbasynyń Táýelsiz Qazaqstan men elordamyzdyń qalyptasýyna sińirgen eren eńbegine degen zor qurmet retinde qabyldaımyz.
Bizdiń - bir Elbasymyz, bir elimiz, bir halqymyz, bir taǵdyrymyz bar!
Biz barlyq qazaqstandyqtardy tatýlyq pen birlikke jáne basty qundylyqtarymyzǵa qurmetpen qaraýǵa shaqyramyz. Sebebi qazaqstandyq joldyń sabaqtastyǵy bizdiń árqaısymyzǵa tikeleı baılanysty.
Biz Qazaqstannyń Tuńǵysh Prezıdenti aıqyndaǵan eldiń strategııalyq basymdyqtaryna sózimizben de, isimizben de tolyq qoldaý kórsetýge jáne Elbasynyń Táýelsizdikti kúsheıtýge, eldi júıeli jańǵyrtýǵa jáne árbir qazaqstandyqtyń ál-aýqatyn arttyrýǵa baǵyttalǵan saıasatyn birlesip jalǵastyrýǵa tıispiz.
Biz bekem birliktiń arqasynda ǵana aldymyzda turǵan barlyq maqsattarǵa qol jetkizip, ortaq Otanymyz - Qazaqstan Respýblıkasynyń ıgiligi men órkendeýin qamtamasyz ete alamyz!
«Nur Otan» partııasy, «Aq Jol» Demokratııalyq partııasy, Qazaqstan Kommýnıstik halyqtyq partııasy, «Aýyl» halyqtyq-demokratııalyq patrıottyq partııasy, «Birlik» saıası partııasy, «Qazaqstan Respýblıkasynyń kásipodaqtar federatsııasy» respýblıkalyq kásipodaqtar birlestigi, «Ardagerler uıymy» respýblıkalyq qoǵamdyq birlestigi, Qazaqstan Respýblıkasynyń «Atameken» Ulttyq kásipkerler palatasy, «Qazaqstan kásipkerleriniń forýmy» zańdy tulǵalar birlestigi, «G-Global-dyń Halyqaralyq hatshylyǵy» qaýymdastyǵy» zańdy tulǵalar birlestigi, «Jasyl» ekonomıkany qoldaý jáne G-Global-dy damytý koalıtsııasy» zańdy tulǵalar birlestigi, «Qazaqstan ýkraındarynyń radasy» zańdy tulǵalar birlestigi, «Qazaqstannyń daǵdarys ortalyqtary odaǵy» zańdy tulǵalar birlestigi, «Qazaqstannyń azamattyq alıansy» zańdy tulǵalar birlestigi, «Qazaqstan Respýblıkasynyń Ulttyq ǵylym akademııasy» respýblıkalyq qoǵamdyq birlestigi, «Qazaqstan Respýblıkasynyń Ulttyq ınjenerlik akademııasy» respýblıkalyq qoǵamdyq birlestigi, «Jańarý» sybaılas jemqorlyqqa qarsy jalpyulttyq qozǵalysy» respýblıkalyq qoǵamdyq birlestigi, «Qazaqstannyń isker áıelderi qaýymdastyǵy» respýblıkalyq qoǵamdyq birlestigi, «Qazaqstan múgedekteriniń konfederatsııasy» respýblıkalyq qoǵamdyq birlestigi, «Qarýly kúshter ardagerleri» respýblıkalyq qoǵamdyq birlestigi, «Respýblıkalyq áıelder keńesi» qoǵamdyq birlestigi, «Qazaqstannyń kásipker áıelderi odaǵy» qoǵamdyq birlestigi, «Qazaqstan jazýshylar odaǵy» qoǵamdyq birlestigi, «Qazaqstan ardagerleri» qaýymdastyǵy, «DOS» táýelsiz ómir ortalyǵy» múgedekter qoǵamdyq birlestigi, «Qazaqstan-2050» Jalpyulttyq qozǵalysy, «Juldyz» balalar qoǵamdyq uıymdarynyń odaǵy» qoǵamdyq birlestigi, Qazaqstan Respýblıkasy Prezıdentiniń «Bolashaq» halyqaralyq stıpendııasy stıpendıattarynyń qaýymdastyǵy.
2019 jylǵy 25 naýryz,
Nur-Sultan qalasy
