Demokratııaǵa qaraı jasalǵan qadam - sarapshylar Prezıdenttiń parlamenttik oppozıtsııany engizý bastamasy týraly
NUR-SULTAN. QazAqparat - Búgin Májilistiń jalpy otyrysynda «Qazaqstan Respýblıkasynyń Parlamenti jáne onyń depýtattarynyń mártebesi týraly» Qazaqstan Respýblıkasynyń Konstıtýtsııalyq zańyna tolyqtyrýlar engizý týraly» Konstıtýtsııalyq zańynyń jobasy maquldandy. Osyǵan oraı, tanymal qazaqstandyq saıasattanýshy, «Birgemiz» qoǵamdyq qory qamqorshylyq keńesiniń múshesi Erlan Saırov pen QR Prezıdenti janyndaǵy Ulttyq qoǵamdyq senim keńesiniń múshesi Marat Shıbutov Memleket basshysynyń parlamenttik oppozıtsııa ınstıtýty bastamasy jónindegi pikirlerimen bólisti.
«Bul QR Prezıdenti Qasym-Jomart Kemeluly Toqaevtyń Ulttyq senim keńesi aıasynda usynǵan saıası reformalar toptamasynyń biri. Bul toptama aýqymdy ári ekijaqty mánge ıe. Birinshiden, oppozıtsııanyń destrýktıvti emes ekendigi aıtylady. Oppozıtsııa - bul elimizdiń damý maqsattaryna qol jetkizýdegi memleket seriktesi. Qundylyq deńgeıinde munyń óte úlken máni bar», - dedi Erlan Saırov «QazAqparat» tilshisimen telefon arqyly suhbattasý barysynda.
Onyń aıtýynsha, ekinshiden, zańnamalyq deńgeıde oppozıtsııalyq qyzmet pen parlamenttik azshylyq qyzmetine kepil bekitiledi.
«ıAǵnı, Parlament ishinde belgili bir artyqshylyqqa, sonymen qatar parlamenttik azshylyq ókiliniń naqty bir laýazymdy ıelenýine kepildik beriledi. Bul álemdik tájirıbe sanalady. Sondyqtan Qazaqstan búgingi kúni saıası reformalardy ilgeriletýde demokratııanyń halyqaralyq standarttaryna saı keledi dep aıtýǵa bolady. Qazirgi ýaqytta biz dál soǵan qaraı kele jatyrmyz», - dedi saıasattanýshy.
Al Marat Shıbutov parlamenttik oppozıtsııa ınstıtýty jaıynda uzaq ýaqyttan beri aıtylyp kele jatqandyǵyn eske salyp ótti.
«Ulttyq qoǵamdyq senim keńesi aıasynda bul ıdeıa jandana tústi. Biz de bul jaıynda bastama kótergen edik. Alaıda depýtat Azat Perýashev bul zańdy ázirlep shyqty. Árıne, bul quqyqtardyń munan da kóp bolǵanyn qalaǵanymyzben osynyń ózi de táýir. Árbir partııa bir komıtet basshylyǵyna ıe bolǵanyn qalar edim. Bul jerde bir tóraǵa laýazymy men komıtetterdiń 2 hatshylyq laýazymy jaıynda ǵana aıtylǵan. Munyń ózi de jap-jaqsy. Bir sessııada parlamenttik tyńdaýǵa bastamashylyq jasaý da durys. Bul Parlamenttegi oppozıtsııalyq partııanyń múmkindikterin aıtarlyqtaı arttyra túser edi. Bul - demokratııaǵa qaraı qadam», - dedi QR Prezıdenti janyndaǵy Ulttyq qoǵamdyq senim keńesiniń múshesi.
Esterińizge sala ketsek, búgin Májilistiń jalpy otyrysynda «Qazaqstan Respýblıkasynyń Parlamenti jáne onyń depýtattarynyń mártebesi týraly» Qazaqstan Respýblıkasynyń Konstıtýtsııalyq zańyna tolyqtyrýlar engizý týraly» Konstıtýtsııalyq zańynyń jobasy maquldandy.
Zań jobasynyń negizgi maqsaty - qoldanystaǵy zańnamada «parlamenttik kópshilik» jáne «parlamenttik oppozıtsııa» uǵymdaryn bekitý boıynsha quqyqtyq negizderdi qamtamasyz etý. Máselen, parlamenttik oppozıtsııaǵa qandaı da bir másele boıynsha óz ustanymyn bildirýge kepildik berý maqsatynda zań jobasynda saıası partııalar fraktsııalary basshylarynyń Parlament Palatalarynyń birlesken otyrystarynda, Parlament Májilisiniń jalpy otyrystarynda, turaqty komıtetterdiń, jumys toptarynyń otyrystarynda, parlamenttik tyńdaýlar men ózge de is-sharalarda sóz sóıleýge kepildik berilgen quqyǵyn bekitý kózdeledi.
