Demokratııa máselesinde qosar standart bolmaý kerek — Eýropa Keńesiniń bas hatshysy
ASTANA. KAZINFORM — Eýropa Keńesiniń bas hatshysy Alen Berse Astanadaǵy halyqaralyq forýmda jańa demokratııa paktisiniń úsh negizin atady.
— Demokratııa qanshalyqty uzaq ómir súre alady. Alty aı ma, bir jyl ma, eki jyl ma? Biz Astanada, Batys pen Shyǵystyń, Ońtústik pen Soltústiktiń toǵysqan jerinde qaýipsizdik, klımattyń ózgerýi, ekonomıka máselelerin talqylaýǵa jınaldyq. Shynymyzdy aıtaıyqshy, osynyń bárin demokratııasyz qamtamasyz ete almaımyz. Eger demokratııa kúırese, báz bireý saıası múddesi úshin jazasyzdyqty qalypty dúnıege aınaldyrsa, eseptilik múmkin emes dúnıege aınalsa, demokratııa kúıreıdi. Ondaı jaǵdaıda dezınformatsııa ústemdik quryp, shyndyq tótep berý quraly bolýdan qalady. Sondyqtan demokratııany qorǵaýymyz kerek, — dedi ol.
Forýmnyń mártebeli meımany demokratııaǵa qorǵan bolmasa, ne bolatynyn Ýkraınadaǵy, Gaza sektoryndaǵy jaǵdaılar kórsetkenin atap ótti.
— Terrorızm, kóshi-qon, sybaılas jemqorlyq, kıberqylmys sııaqty faktorlar kúnnen-kúnge ózekti bolyp barady. Olarmen kúresý kerek. Qosar standarttardy teriske shyǵarý kerek. Qosar standarttan qoǵam senimin setinetedi. Bizge demokratııaǵa tónip turǵan qaýip bar ekenin túısiný kerek. Bálkim onyń qaterin tolyqtaı sezinip jatpaǵan shyǵarmyz. Sondyqtan egemendik múddesi úshin keıbir tyıym erejeleri jumys istep turǵan shyǵar. Keı adamdardy tym qatty ketýge májbúrleıtin zańdar qabyldanyp jatady. Sondyqtan qazir jańa demokratııalyq paktiler ázirlep jatyrmyz. Bul pakt úshin negizgi basymdyqqa negizdelgen. Birinshisi — bilim berý. Ekinshisi — qorǵanys. Úshinshisi — ınnovatsııa. Bul jaı ǵana kezekti bir daǵdarys emes. Eshbir el, eshbir ınstıtýt bul daǵdarysty jalǵyz eńsere almaıdy. Osyndaı kezeńderde demokratııa sııaqty qundylyqtardy keıinge ysyra turýǵa bolatyn shyǵar degen oılar týyndap jatady. Biraq bizge álemdegi qozǵalystardyń betalysyn túsiný qajet, — dedi Eýropa Keseniń Bas hatshysy.
Aıta keteıik, elordada Memleket basshysy Qasym-Jomart Toqaevtyń qatysýymen Astana halyqaralyq forýmy ótip jatyr.
Forýmǵa 7 000-nan astam qatysýshy tirkelgen. Eýropa, Ortalyq Azııa, Taıaý Shyǵys pen Afrıka elinen BUU, AAU, HKU jáne DZMU sııaqty jetekshi halyqaralyq uıymdardyń atynan 160-tan astam spıker shaqyrylǵan. Eki kún boıy olar túrli salanyń sarapshylarymen birlesip, memleketaralyq yntymaqtastyq modelin, jańa jahandyq áriptestik qurýdyń keleshegin talqylaıdy.
Buǵan deıin forýmnyń mártebeli meımandar qatarynda Rýanda Respýblıkasynyń Prezıdenti Pol Kagamen, Albanııa Premer-Mınıstri Edı Ramany, Horvatııa Respýblıkasynyń Premer-Mınıstri Andreı Plenkovıchti, Qatar Premer-Mınıstri — Syrtqy ister mınıstri sheıh Muhammed ben Abdýlrahman Ál Tánı bar ekeni habarlanǵan bolatyn.